ریاض: سعودی عرب میں پاکستانی سفارت خانے کی جانب سے فلسطینیوں کے ساتھ اظہار یکجہتی کے لیے تقریب کا انعقاد عمل میں آیا۔
تفصیلات کے مطابق پاکستانی سفارت خانے میں منعقدہ تقریب میں سفارتی عملے کے علاوہ پاکستانی کیمونٹی نے بھی بھرپور شرکت کی۔
فلسطینی عوام سے اظہار یکجہتی کرتے ہوئے مقررین کا کہنا تھا کہ فلسطین کے نہتے عوام پر اسرائیلی فورسز کی جانب سے قتل عام اور بیت المقدس پر قبضہ انتہائی شرمناک عمل ہے۔
تقریب سے خطاب کرتے ہوئے مقررین نے کہا کہ جس طرح امریکہ اسرائیل کو مضبوط بنا رہا ہے اور فلسطین کے مؤقف سے پیچھے ہٹ چکا ہے اس سے امریکی عزائم کھل کر پوری دنیا کے سامنے آگئے ہیں۔
قائم مقام سفیر سردار خان خٹک نے اپنے خطاب میں کہا کہ پاکستانی قوم اور حکومت ہمیشہ فلسطین کے مؤقف کی حمایت کرتی رہی ہے اور آئندہ بھی ان کی اخلاقی اور سفارتی حمایت جاری رکھے گی۔
انھوں نے کہا کہ اقوام عالم کو بھی چاہیے کہ وہ فلسطینیوں کی زمین پر اسرائیلی قبضے اور اس کی جانب سے نہتے فلسطینیوں کے بہتے ہوئے خون کا نوٹس لے۔
امریکی سفارت خانے کی یروشلم منتقلی غیر قانونی ہے، سعودی وزیرخارجہ
قائم مقام سفیر نے اقوام عالم سے مطالبہ کیا کہ وہ فلسطینیوں پر اسرائیل کی جانب سے ہونے والے بد ترین مظالم کو روکے تاکہ فلسطینی بھی آزاد اور پُر امن ماحول میں زندگی بسر کر سکیں۔
پاکستانی سفارت خانے میں منعقد ہونے والی اس تقریب سے ہیڈ آف چانسری سیف اللہ، تصدق گیلانی، ڈاکٹر آصف اور دیگر نے بھی خطاب کرکے فلسطینیوں کے ساتھ یک جہتی کا بھرپور اظہار کیا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
