سری نگر: مقبوضہ کشمیر میں بھارتی فوج نے ظلم کی انتہا کردی، درندہ صفت اہلکاروں نے فائرنگ کرکے مزید 3 نہتے اور مظلوم کشمیری نوجوانوں کو شہید کردیا۔
کشمیر میڈیا سروس کا کہنا ہے کہ مقبوضہ وادی کے علاقے شوپیاں میں بھارتی فوج کی فائرنگ سے 3کشمیری نوجوان شہید ہوگئے، قابض فوج نے شوپیاں اور قریبی علاقوں کا محاصرہ کررکھا ہے اور گھر گھر تلاشی بھی لی جارہی ہے۔
بھارتی فوج نے خواتین سے بدتمیزی کی اور متعدد نوجوان گرفتار کرلیا ہے۔
شوپیاں میں ہی گزشتہ روز 9 کشمیریوں کو شہید کیا گیا تھا۔ قبل ازیں اسی علاقے میں ہی 5 نوجوانوں کی شہادتیں اور ضلع کے اسی علاقے میں ایک جھڑپ میں تین بھارتی فوجی شدید زخمی ہوگئے تھے۔
مقبوضہ کشمیر میں مزید4 نوجوان شہید، 24 گھنٹوں میں تعداد 9ہوگئی
علاوہ ازیں پونچھ اور پلواما میں دو بھارتی فوجی افسروں نے سرکاری اسلحے سے خودکشی کرلی تھی۔
خیال رہے کہ قابض فوج نے ضلع میں تمام مواصلاتی نظام موبائل، انٹرنیٹ سروس کی خدمات کو بھی معطل کردیا جبکہ مقبوضہ وادی کے مختلف علاقوں سری نگر، بارہمولہ، بانڈی پور، کپواڑہ، گندربل، بڈگام، اسلام آباد، پلوامہ، کولگام، رامبن، راجوری، پونچھ، کِشتھوڑ، ڈوڈا کا محاصرہ کرکے سرچ آپریشن شروع کردیا۔
