اسلام آباد: کتاب لکھنے کے معاملے پر سابق ڈی جی آئی ایس آئی جنرل (ر) اسد درانی کا نام ای سی ایل میں ڈال دیا گیا، ذرائع وزارت داخلہ کا کہنا ہے کہ اسد درانی کے خلاف اعلیٰ سطح کی تحقیقات ہوں گی۔
تفصیلات کے مطابق آرمی چیف جنرل قمرجاوید باجوہ کے حکم پر سابق ڈائریکٹر جنرل آئی ایس آئی کو ان کی کتاب کے سلسلے میں آج جی ایچ کیو طلب کیا گیا تھا۔
آئی ایس پی آر کے مطابق جنرل ریٹائرڈ اسد درانی سے متعلق عدالتی تحقیقات لیفٹیننٹ جنرل کی سربراہی میں کی جائیں گی، سابق ڈی جی آئی ایس آئی اس سلسلے میں جی ایچ کیو میں پیش ہوچکے ہیں۔
ذرائع کا کہنا ہے کہ پاک فوج کی جانب سے جنرل (ر) اسد درانی کی کتاب پر تحفظات کا اظہار کیا گیا تھا، جی ایچ کیو میں ان سے وضاحت طلب کی گئی۔
ذرائع کے مطابق اسد درانی سے جی ایچ کیو میں وضاحت طلب کیے جانے کے بعد فوری ایکشن لیا گیا اور ان کا نام ای سی ایل میں ڈالنے کے لیے درخواست دے دی گئی۔
لیفٹیننٹ جنرل ریٹائرڈ اسد درانی آج جی ایچ کیومیں پیش ہوں گے
ذرائع نے بتایا کہ اسد درانی کی کتاب میں بیان کردہ متعدد موضوعات حقائق کے برعکس ہیں، اپنی کتاب میں انھوں نے ملٹری کوڈ آف کنڈکٹ کی خلاف ورزی کی ہے۔
واضح رہے کہ لیفٹیننٹ جنرل اسد درانی اگست 1990 سے مارچ 1992 تک آئی ایس آئی کے سربراہ رہے ہیں جنہوں نے سابق را چیف اے ایس دلت کے ساتھ مل کر ایک کتاب ’دی اسپائے کرونیکلز: را، آئی ایس آئی اینڈ دی الوژن آف پیس‘ لکھی ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
