امریکی ریاست مینیا پولس میں سیاہ فام جارج فلائیڈ کو قتل کرنیوالا سابق پولیس افسر قاتلانہ حملے میں شدید زخمی ہوگیا۔
غیر ملکی ذرائع ابلاغ کا اس حوالے سے کہنا ہے کہ امریکی ریاست مینیا پولس کے سابق پولیس افسر ڈیرک چوون پر ساتھ رہنے والے قیدی نے چاقو سے حملہ کیا جس میں وہ شدید زخمی ہوگیا۔
امریکی میڈیا کا اس حوالے سے کہنا ہے کہ یہ واقعہ ایری زونا میں واقع فیڈرل کریکشنل انسٹی ٹیوٹ میں جمعہ کو پیش آیا جس میں سابق پولیس افسر کو شدید زخم آئے ہیں۔
فیڈرل بیورو آف پریزن نے ڈیرک پر چاقو سے حملے کی تصدیق کی اور ملزم کا نام بتانے سے گریز کیا ہے، جبکہ انسٹی ٹیوٹ کی جانب سے اس واقعے پر فوری طور پر کوئی ردعمل جاری نہیں کیا گیا ہے۔
یاد رہے کہ سال 2020 میں سیاہ فام امریکی شہری جارج فلایئڈ کو ریاست مینیا پولس میں اس وقت کے پولیس افسر ڈیرک نے گرفتار کرکے سڑک پر گھٹنے کے بل لٹا دیا تھا، اس دوران ڈیرک نے مسلسل 9 منٹ جارج کے گلے پر گھٹنا رکھا، جس کے باعث وہ موت کی وادی میں چلا گیا۔
مذکورہ واقعے کی ویڈیو سوشل میڈیا پر وائرل ہونے کے بعد دنیا بھر میں احتجاج کی لہر دوڑ گئی اور دنیا کے بیشتر ممالک میں ’بلیک لائیوز میٹر‘ کے نام سے ایک تحریک بھی چلائی گئی تھی۔
مقامی عدالت کی جانب سے سابق پولیس افسر کو سیاہ فام شہری کے قتل کے الزام میں جون 2022 کو ساڑھے 22 سال قید کی سزا سنائی گئی تھی۔
