واشنگٹن : ترجمان امریکی محکمہ خارجہ میتھیو ملر نے کہا ہے کہ امریکہ سابق پاکستانی وزیراعظم کےخلاف سازش میں ملوث نہیں تھا۔
واشنگٹن میں پریس کانفرنس کرتے ہوئے میتھیو ملر نے صحافی کی جانب سے سوال پوچھا گیا کہ خفیہ کیبل میں خبر آئی ہے کہ امریکا نے سابق وزیر اعظم کو ہٹانے کیلئے پاکستان پر دباؤ ڈالا؟ کیا امریکا سابق پاکستانی وزیراعظم کے خلاف سازش میں ملوث تھا؟
جس کے جواب میں ترجمان امریکی محکمہ خارجہ نے واضح الفاظ میں کہا کہ امریکا کسی سازش میں ملوث نہیں، پاکستان سے متعلق امریکا پر لگائے گئے الزامات جھوٹے ہیں اور رہیں گے۔
صحافی نے سوال کیا کہ کیا امریکا کو چیئرمین تحریک انصاف کے دورہ روس پرناراضگی تھی؟ جس پر میتھیو ملر نے کہا کہ ہم نے سابق وزیراعظم پاکستان کے دورہ روس پر اظہار تشویش کا کیا تھا۔
ترجمان کا کہنا تھا کہ سابق وزیراعظم پاکستان نے روس کے یوکرین پر حملے والے دن وہاں کا دورہ کیا تھا جس پر ہم نے واضح طور پر تشویش کا اظہار کیا۔
ایک سوال کے جواب میں امریکی محکمہ خارجہ کا کہنا تھاکہ سامنے آنے والی پاکستانی دستاویزات پر کوئی تبصرہ نہیں کروں گا، پاکستانی سفارت کاروں سے ہونے والی نجی گفتگو پر بات نہیں کرسکتا۔
ترجمان نے مزید کہا کہ سامنے آنے والی دستاویزات یہ بات ثابت نہیں کرتی کہ امریکا نے کسی پاکستانی رہنما کا انتخاب کیا یا نہیں۔ سابق پاکستانی سفیر بھی کہہ چکے ہیں کہ امریکا پرالزامات جھوٹے ہیں۔
