وفاقی دارالحکومت کے سیکٹر ایف نائن پارک میں لڑکی کو اسلحے کے زور پر اغوا کے بعد اجتماعی زیادتی کا نشانہ بنانے کے دلخراش واقعے پر پیش رفت ہوئی ہے۔
ذرائع کے مطابق متاثرہ لڑکی کی مدد سے ایک ملزم کا خاکہ تیار کرلیا گیا ہے، جسے ایف نائن پارک کے اطراف سے حاصل کی گئی فوٹیج سے میچ کیا جارہا ہے۔
لڑکی کے ساتھ زیادتی کا مقدمہ تھانہ مارگلہ میں درج کیا جاچکا ہے، متاثرہ لڑکی کا کہنا ہے کہ وہ وہ ملزمان کو سامنے آنے پر شناخت کرسکتی ہے۔
واضح رہے کہ گذشتہ اسلام آباد کے ایف 9 پارک میں لڑکی کو مبینہ طور پر اجتماعی زیادتی کا نشانہ بنایا گیا تھا، متاثرہ لڑکی نے پولیس کو دیئے گئے بیان میں بتایا کہ دوست کے ساتھ پارک آئی تھی دو افراد نے گن پوائنٹ پر روکا اور مجھے جنگل میں لے جاکر زیادتی کا نشانہ بنایا ۔
یہ بھی پڑھیں: اسلام آباد کے ایف نائن پارک میں لڑکی سے مبینہ اجتماعی زیادتی
متاثرہ لڑکی نے پولیس کو دئیے ابتدائی بیان میں بتایا کہ درندہ صفت ملزمان نے دھمکی دی کہ اگر کسی کو بھی اس بارے میں بتایا تو تمہیں جان سے مار دیں گے، میں نے اُن سے ہاتھ جوڑ کر زیادتی نہ کرنے التجا کی تو انہوں نے تشدد کا نشانہ بنایا اور ٹانگ پر پستول کا بٹ مارا۔
لڑکی کا پمز اسپتال میں طبی معائنہ ہوا جس کی میڈیکل رپورٹ میں جسم پر تشدد کے نشانات پائے گئے ہیں، واقعے کے بعد پولیس نے پارک انتظامیہ کو بھی شامل تفتیش کرلیا ہے۔
