سان فرانسسکو: سماجی رابطے کی سب سے بڑی ویب سائٹ فیس بک نے نئے سال کا آغاز ہوتے ہی اپنی میسنجر ایپ میں بڑی تبدیلی کردی۔
تفصیلات کے مطابق فیس بک اپنے صارفین کو متاثر کرنے کے لیے ایپ میں نت نئے فیچر ز شامل کرتا ہے، چونکہ گزشتہ سال مارک زکربرگ اور اُن کی کمپنی کے لیے سیکیورٹی بریچ کے باعث بہت برا ثابت ہوا تھا اس لیے ماہرین نے سال نو کے آغاز پر ہی نئی آزمائشی سروس متعارف کروائی۔
ٹیکنالوجی پر نظر رکھنے والی خاتون صحافی جین مین چن وانگ نے سماجی رابطے کی ویب سائٹ پر دو علیحدہ علیحدہ تصاویر ٹویٹ کرتے ہوئے بتایا ہے کہ فیس بک نے ڈارک موڈ میسنجر ایپ کی آزمائشی سروس مخصوص صارفین اور ممالک کے لیے متعارف کرادی۔
قبل ازیں فیس بک مسینجر کا رنگ ہلکا نیلا اور اس کی پشت بالکل سفید رنگ تھا مگر اب یہ سیاہ ہوگا اور دوستوں کے نام سفید رنگ سے لکھے نظر آئیں گے جبکہ آن لائن لوگوں کی نشاندہی نیلے رنگ سے ہوگی۔
قبل ازیں فیس بک نے گزشتہ برس 24 نومبر کو میسنجر ایپ کے ڈیزائن میں تبدیلی کا فیصلہ کرتے ہوئے Tabs کو کم کرنے کا اعلان کیا تھا، اس اقدام کا مقصدر صارفین کے لیے اسے مزید آسانیاں پیدا کرنا تھا۔
مزید پڑھیں: فیس بک میسنجر میں تبدیلی، آزمائشی فیچرکا تجربہ
ٹیکنالوجی پر نظر رکھنی والی ویب سائٹ نے دعویٰ کیا تھا کمپنی میسنجر ایپ میں 9 کے بجائے تین ٹیبز مہیا کرنے کا ارادہ رکھتی ہے، جن میں سیکیورٹی فلٹر آپشن دیا گیا ہے، یعنی صارف جن لوگوں سے چیٹ کرنا چاہیے گا اپنی مرضی سے کرے گا بقیہ دیگر اُسے پیغام ارسال نہیں کرسکیں گے۔
سروس میں فیس بک کے دوستوں کے دوست، جن دوستوں نے موبائل نمبر سے فیس بک آئی ڈی بنائی ہے، جو لوگ آپ کو انسٹاگرام پر فالو کرتے ہیں یا دیگر صارفین سب کو پیغام بھیجنے کے لیے اجازت کی ضرورت ہے۔
گزشتہ برس فیس بک کے نائب صدر اسٹان نے تبدیلی کا عندیہ دیتے ہوئے کہا تھا کہ ’کئی برسوں میں ہماری ٹیم نے میسنجر کے حوالے سے کافی مہارت حاصل کرلی، ایپ میں تبدیلیاں آسان نہیں تھیں البتہ ہمارے لیے اب سب کچھ ممکن ہے‘۔
یہ بھی پڑھیں: فیس بک میسنجر ایپ میں بڑی تبدیلیوں کا فیصلہ
اسی سے متعلق: فیس بک میسج واپس لینے کا فیچر متعارف
یاد رہے کہ فیس بک نے صارفین کی شکایات کو مدنظر رکھتے ہوئے مسینجر سے بھیجے جانے والے پیغام کو واپس لینے کے فیچر پر بھی کام شروع کیا ہوا ہے۔
