سان فرانسسکو: سماجی رابطے کی سب سے بڑی ویب سائٹ فیس بک نے اینڈرائیڈ سسٹم پر انحصار ختم کر کے اپنا آپریٹنگ سسٹم متعارف کرانے کا فیصلہ کرلیا۔
بین الاقوامی میڈیا رپورٹس کے مطابق فیس بک انتظامیہ نے فیصلہ کیا کہ وہ جلد اینڈرائیڈ سسٹم پر انحصار ختم کر کے اپنا آپریٹنگ سسٹم متعارف کرائے گی جس کی تیاری پر ٹیکنیکل ٹیم نے کام شروع کردیا۔
رپورٹ کے مطابق فیس بک نے نئے آپریٹنگ سسٹم کی تیاری کے لیے ونڈوز این ٹی تیار کرنے والے سافٹ ویئر انجینئر مارک لیوکوسکی کی سربراہی میں ایک ٹیم تشکیل دی جس نے ڈیزائن و دیگر چیزیں مکمل کرلی ہیں۔
مزید پڑھیں: غیرمعیاری مواد سے کم عمر بچوں کو دور رکھنے کے لیے فیس بک کا اہم اقدام
فیس بک کا نیا آپریٹنگ سسٹم کیسا ہوگا یا کس انداز سے کام کرے گا اس حوالے سے مزید اطلاعات سامنے نہ آسکیں اور نہ ہی انتظامیہ نے اس خبر کی کوئی تصدیق یا تردید کی البتہ ٹیکنالوجی پر نظر رکھنے والے ماہرین کا خیال ہے کہ فیس بک کی ٹیم پہلے مرحلے میں اوکیولس رئیلٹی ہیڈ سٹ اور پورٹل ویڈیو چیٹ ڈیوائس پر کام کررہی ہے۔
ماہرین کا ماننا ہے کہ آپریٹنگ سسٹم کی تیاری کے بعد اسے آزمائشی طور پر تقریباً 6 ماہ تک استعمال کیا جائے گا تاکہ تکنیکی خرابیوں کو دور کیا جاسکے اور پھر اسے دنیا بھر کے صارفین کے لیے متعارف کرایا جائے گا۔
فیس بک سے وابستہ ایک افسر نے اشارہ دیتے ہوئے بتایا کہ ممکن ہے مستقبل میں ہمارا گوگل سافٹ ویئر پر انحصار ختم ہوجائے یا پھر کنٹرول کو کم کردیا جائے۔
اُن کا کہنا تھا کہ ’فیس بک کا خیال ہے کہ ہم مارکیٹ یا حریف کمپنیوں پر اعتبار نہ ہی کریں تو بہتر ہوگا، صارفین کو جدید سہولیات فراہم کرنے کے لیے ہمیں اپنے بل پر آگے بڑھنا ضروری ہے‘۔