سان فرانسسکو: سماجی رابطے کی سب سے بڑی ویب سائٹ فیس بک نے صارفین کے لیے نیا فیچر متعارف کرادیا جس کے بعد اب انہیں انسٹاگرام اور فیس بک چیٹ کے لیے علیحدہ علیحدہ میسنجر پر جانے کی ضرورت نہیں ہوگی۔
فیس بک کی جانب سے جاری بیان میں بتایا گیا ہے کہ دونوں اپیلیکیشن استعمال کرنے والے صارفین اب کسی ایک ایپ سے دونوں پر چیٹ کرسکتے ہیں۔
کمپنی کی جانب سے جاری بیان کے مطابق انسٹاگرام اور فیس بک میسنجر بدستور خودمختار رہیں گے اور ان کے ان باکسز بھی الگ ہوں گے۔
کہا جارہا ہے کہ فیس بک کی جانب سے متعارف کرائی جانے والی سروس کے بعد صارفین کو اپنے دوستوں اور پیاروں سے رابطہ رکھنے میں آسانی ہوگی کیونکہ کچھ لوگ انسٹاگرام تو کچھ فیس بک کے استعمال سے گریز کرتے ہیں۔
یاد رہے کہ فیس بک کی جانب سے تمام میسجنگ ایپس یعنی فیس بک میسنجر، واٹس ایپ اور انسٹاگرام کو اکٹھا کرنے پر کام کیا جارہا ہے اور یہ فیچر ممکنہ طور پر اسی پروجیکٹ کا حصہ ہے۔
فیس بک کی جانب سے واٹس ایپ صارفین کو میسنجر اور انسٹاگرام پر موجود لوگوں سے چیٹ کرنے کی سہولت فراہم کرنے پر بھی کام ہورہا ہے، مگر ابھی یہ واضح نہیں کہ یہ سہولت کیسے استعمال کی جائے گی۔
مزید پڑھیں: فیس بک، واٹس ایپ اور انسٹاگرام میسنجر کو ایک کرنے کی تیاری
میسنجر کے پروڈکٹ ڈیزائن کی سربراہ لورڈینا کرسیان کا کہنا تھا کہ ’میسجنگ ایپ کو ایک جگہ پر جمع کرنا ہمارے لیے بڑا چلینج تھا مگر ہم نے کامیابی حاصل کرلی ہے‘۔
Today we’re sharing an update to @instagram DMs that will bring the best of @Messenger to the app. You’ll soon be able to communicate across apps with features like watch together, selfie stickers, vanish mode, emoji reactions and more. https://t.co/QOBnvuL8sP pic.twitter.com/i6QGGJyK1p
— Facebook (@Facebook) September 30, 2020
ٹیکنالوجی پر نظر رکھنے والے ماہرین کے مطابق فیس بک نے صارفین کی سیکیورٹی کو مدنظر رکھتے ہوئے میسج انکرپٹ پر بھی کام شروع کردیا ہے تاکہ پیغامات کی ترسیل محفوظ ہوسکے اور صارفین کا اعتماد بحال رہے۔
انسٹاگرام کے پراڈکٹ ہیڈ وپل شا نے بتایا ‘ہم فیس بک فیملی ایپس کے اندر اس طرح کے کام کو ترجیح دے رہے ہیں، ہوسکتا ہے کہ مستقبل میں اس کو زیادہ بڑے پیمانے یعنی مخالف ایپس تک توسیع دی جائے، مگر یہ بہت مشکل کام ہوگا’۔
یہ بھی پڑھیں: فیس بک کا موبائل صارفین کے لیے خاموشی سے بڑا سرپرائز
ایک ہی میسنجر کی سہولت فی الوقت چند ممالک کے صارفین کے لیے متعارف کرائی گئی ہے، کامیاب آزمائش کے بعد اسے تمام صارفین استعمال کرسکیں گے۔
Say 👋 to new messaging features 🎉
Communication across our apps, features like watch together, selfie stickers, vanish mode, emoji reactions and more — these changes make it even easier to stay connected with friends and family. ✨https://t.co/kVGSeQB1Cf pic.twitter.com/7C5n2vdSEc
— Instagram (@instagram) September 30, 2020
اس فیچر کو استعمال کرنے کے لیے صارفین کو انسٹاگرام اور میسنجر ایپس میں سیٹنگز کو بدلنا ہوگا تاکہ وہ دونوں سروسز میں اپنے دوستوں اور پیاروں سے بات کرسکیں۔ میسنجر میں یہ آپشن میسج ڈیلیوری سیکشن میں چھپا ہوگا جبکہ انسٹاگرام پر یہ میسج کنٹرولز میں موجود ہوگا۔
