افغانستان پر طالبان کا قبضہ ہوتے ہی افغان شہریوں کی اپنی جان خطرے میں ڈال کر ملک سے بھاگنے کی ویڈیو نے دنیا کو ہلا کر رکھ دیا تھا۔
ایسی ہی ایک ویڈیو انٹرنیٹ پر بہت زیادہ وائرل ہورہی ہے جس میں ایک شخص کو جہاز کے ٹربائن انجن پر سوار ہوکر سفر کرتے دیکھا گیا ہے، ویڈیو شیئر کرنے والے بھارتی شہری کا دعویٰ ہے کہ یہ افغانی شہری ہے جو طالبان کے ڈر سے ملک سے فرار ہورہا ہے۔
ٹوئٹر صارف کملیش اوجا نامی بھارتی شہری نے اس ویڈیو کو شیئر کیا اور فیس بک پر گلستان نیوز چینل کے نام سے موجود پیج سے یہ ویڈیو شیئر کی جس کا کیپشن تھا کہ ’افغانستان کے شہری طالبان کے قبضے سے خوفزدہ ہوکر موت کو گلے لگارہے ہیں اور جہاز کے پروں پر سوار ہوکر سفر کررہے ہیں‘۔
#Citizens of Afghanistan scared of TB occupation hugging deaths and riding on the wings of the Airplane pic.twitter.com/cl8AwCL20Z
— Kamlesh Kumar Ojha🇮🇳 (@Kamlesh_ojha1) August 17, 2021
ویڈیو سوشل میڈیا پر شیئر ہونے کے بعد متعدد ٹوئٹر صارفین نے اسے مختلف کیپشن کے ساتھ شیئر کیا تاہم ایک بھارتی شہری نے ویڈیو کو گوگل پر سرچ کیا تو پتہ چلا کہ یہ ویڈیو پہلے افغانستان پر طالبان کا کنٹرول قائم ہونے سے قبل ہی موجود تھی۔
میڈیا رپورٹ کے مطابق اس ویڈیو 17 دسمبر 2020 کو یوٹیوب چینل ’کوئن ہووا‘ پر اپلوڈ کیا گیا تھا، ویڈیو میں ’ایک شخص کو جہاز کے ٹربائن انجن پر بیٹھ کر مختلف سرگرمیاں انجام دیتے ہوئے دکھایا گیا ہے جب کہ جہاز ہوا میں پرواز کررہا ہے‘ اور یہ سب فوٹو شاپ کا کمال ہے۔
لہذا، یہ نتیجہ اخذ کیا جا سکتا ہے کہ وائرل ویڈیو جس میں دعویٰ کیا گیا ہے کہ وہ ایک افغان شخص ہے جو پرواز کرتے ہوائی جہاز کے ٹربائن انجن سے لپٹا ہوا ہے وہ جعلی ہے اور فوٹو شاپ کا کمال ہے۔
واضح رہے کہ جب سے طالبان نے کابل کا کنٹرول حاصل کیا ہے افغان شہریوں نے امریکی جہاز کے پہیوں پر لٹک کر بھاگنے میں بھی عافیت جانی تاہم وہ سفر ان کی موت کا باعث بنا کیوں کہ وہ فضا میں بلند ہوتے ہی ہزاروں فٹ کی بلندی سے زمین پر آگرے۔
