اسلام آباد:وفاقی وزیر برائے آبی وسائل فیصل واوڈا کا کہنا ہے کہ موجودہ حکومت ہی مہمند ڈیم کی تعمیر کا منصوبہ مکمل کرے گی۔

ان خیالات کا اظہار انھوں نے معاون خصوصی برائے اطلاعات فردوس عاشق اعوان کے ساتھ خصوصی پریس کانفرنس کرتے ہوئے کیا۔

ان کا کہنا تھا کہ حکومت نے مہمند ڈیم کی تعمیرکا فیصلہ کیا ہے، وفاقی کابینہ اجلاس میں مہمند ڈیم کی تعمیرکی منظوری دی گئی، افتتاح 2 مئی کو کیا جا رہا ہے، وزیر اعظم سنگ بنیاد رکھیں گے۔

فیصل واوڈا کا کہنا تھا کہ بیرونی اوراندرونی قوتوں نے مہمند ڈیم کو کالا باغ بنانے کی کوشش کی، مگر انھیں ناکامی ہوئی۔ وزیر اعظم سنگ بنیاد رکھیں گے، افتتاحی تقریب کے لئے سابق چیف جسٹس ثاقب نثار آرمی چیف کو بھی مدعوکیا گیا ہے.

پریس کانفرنس: صرف ہفتے دس دن میں پاکستان میں نوکریوں کی بارش ہونے والی ہے،فیصل واوڈا

وفاقی وزیر کا کہنا تھا کہ مہمند ڈیم کا پروجیکٹ 54 سال سے پھنسا ہوا تھا، یہ میری پیدائش سے بھی پہلے کا منصوبہ تھا، جو اس دور حکومت میں مکمل ہوگا.

خیال رہے کہ اس موقع پر کابینہ اجلاس سے متعلق بریفنگ دیتے ہوئے فردوس عاشق اعوان نے کہا تھا کہ وزیر اعظم نے اوگرا کو پیٹرولیم مصنوعات کی قیمتوں میں اضافے کی سمری پر نظر ثانی کی ہدایت کی ہے۔

اس موقع پر انھوں نے پی ٹی ایم کی ملک دشمن سرگرمیوں پر بھی روشنی ڈالی۔