فیصل آباد میں نوجوان کو سستا بازار لگانے کے تنازع پر قتل کردیا گیا۔ مقتول کی فائرنگ سے ایک حملہ آور بھی مارا گیا تھا، قتل کی سی سی ٹی وی فوٹیج اے آر وائی نیوز نے حاصل کرلی۔
تفصیلات کے مطابق فیصل آباد کے علاقے ملک پور میں6مارچ کو گھات لگائے دو موٹر سائیکل سواروں نے فائرنگ کرکے قیصرکو قتل کیا تھا۔ اے آر وائی نیوز کو حاصل ہونے والی سی سی ٹی وی فوٹیج میں دو ملزمان کو چوک میں کھڑے دیکھا جاسکتا ہے۔
موٹر سائیکل سوار قیصر کو دیکھ کر ایک ملزم اس پر فائرنگ کرتا ہے جس سے قیصر زخمی ہو کر موٹرسائیکل سے سڑک پر گر جاتا ہے۔
فوٹیج میں دیکھا جاسکتا ہے کہ زخمی قیصر بھی حملہ آور پر فائرنگ کرتا ہے، اس دوران حملہ آور کا ساتھی سڑک پر گرے قیصر پر گولیاں برسانے کے بعد اپنے زخمی ساتھی کو چھوڑ کر موٹرسائیکل پر فرار ہو جاتا ہے۔
بعد ازاں زخمی حملہ آور احمد رضا کو الائیڈ اسپتال منتقل کیا گیا جہاں وہ زخموں کی تاب نہ لاتے ہوئے چل بسا تھا، تھانہ منصورآباد پولیس دو روز بعد بھی فرار ہونے والے ملزم اسامہ کو گرفتار نہیں کرسکی۔
