اسلام آباد: پاکستان سے 12 ہزار 96 مبینہ جعلی پاسپورٹ کے اجرا کی تحقیقات کے لیے 5 رکنی کمیٹی تشکیل دے دی گئی۔
اے آر وائی نیوز کے مطابق سعودی حکومت نے مبینہ جعلی پاسپورٹ پاکستانی سفارتخانے کے حوالے کیے تھے جس کی تحقیقات کے لیے ڈی جی پاسپورٹ اینڈ امیگریشن کی سربراہی میں پانچ رکنی کمیٹی تشکیل دی گئی ہے۔
کمیٹی میں ڈپٹی سیکریٹری ایف آئی اے، وزارت داخلہ، نادرا کا ایک، ایک نمائندہ شامل ہوگا۔ کمیٹی تعین کرے گی کہ کن لوگوں کی ملی بھگت سے جعلی پاسپورٹ جاری کیے گئے۔
اسسٹنٹ ڈائریکٹر ایڈمن پاسپورٹ کمیٹی کے سیکریٹری ہوں گے، کمیٹی پاسپورٹ کے اجرا میں کوتاہی کا پتا لگائے گی۔
کمیٹی پاسپورٹ ایف آئی اے اور دیگر اداروں کی ذمہ داری کا تعین کرے گی، کمیٹی تجاویز بھی دے گی کہ مستقبل میں ایسے خطرات کو کیسے روکا جاسکتا ہے۔
تحقیقاتی کمیٹی 15 دن کے اندر اپنی رپورٹ نگراں وزارت داخلہ کو پیش کرے گی۔
