مشہور کامیڈین نے انکشاف کیا ہے کہ ان کے والد کے ہاتھوں 7 افراد کا قتل ہوا، نجی ٹی وی کے پروگرام میں انھوں نے یہ بات بتائی۔
پاکستان کے معروف کامیڈین اکرم اداس ایک ٹی وی پروگرام میں بطور مہمان شریک ہوئے، جہاں انھوں نے اپنی فیملی کے حوالے سے گفتگو کرتے ہوئے بتایا کہ میرے والد بہت اچھے انسان تھے، وہ ہمیشہ کمزور لوگوں کا ساتھ دیتے اور کبھی کسی پر ظلم نہیں کرتے تھے، تاہم حالات نے ان سے 7 لوگوں کا قتل کروایا۔
اکرام اداس نے بتایا کہ وہ ایک کھاتے پیتے گھرانے سے تعلق رکھتے تھے لیکن انسان کی زندگی میں برا وقت بتا کر نہیں آتا۔
انھوں نے کہا کہ جب والد جیل چلے گئے تو اس کے بعد ہم نے اپنا آبائی شہر بھی چھوڑ دیا اور پھر کبھی وہاں واپس نہیں گئے۔
کامیڈین نے ماضی کو یاد کرتے ہوئے کہا کہ میرے والد غلط کاموں میں پھنس گئے اور ایسا کیوں ہوا نہیں پتا، جس کی وجہ سے 7 لوگ ان کے ہاتھوں اپنی جان گنوا بیٹھے، والد جیل گئے تو کیسز لڑتے ہوئے ساری زمین جائیداد فروخت کرنا پڑی۔
معروف اسٹیج کامیڈین نے بتایا کہ 14 سال تک ان کے والد جیل کی سلاخوں کے پیچھے رہے، انھیں اور بھائیوں کو بچپن سے ہی بہت محنت کرنی پڑی اور انھوں نے کافی مشکل وقت دیکھا۔
