لاہور : پی ٹی آئی کے رہنما فرخ حبیب نے کہا ہے کہ عمران خان پر حملے کے ملزم کو طوطے کی طرح رٹایا گیا تھا کہ وہ مذہبی جنونی ہے۔
لاہور میں میڈیا سے گفتگو کرتے ہوئے پی ٹی آئی رہنما کا کہنا تھا کہ کور اپ اسٹوری کے لیے جو طوطا کہانی تیار کی گئی تھی وہ فلاپ ہوگئی۔
فرخ حبیب نے کہا کہ حملے کے وقت جائے وقوعہ پر کم سے کم دو حملہ آور لازمی موجود تھے بلکہ اس سے زیادہ بھی ہوسکتے ہیں۔
انہوں نے کہا کہ حملے کے ملزم نوید کو طوطے کی طرح رٹایا لگوایا گیا تھا کہ وہ مذہبی جنونی ہے، اسی لیے ہم کہتے ہیں کہ عمران خان پر مکمل منصوبہ بندی کے تحت قاتلانہ حملہ کرایا گیا ہے۔
پی ٹی آئی رہنما نے کہا کہ جو بیانیہ بنایا جارہا تھا کہ یہ ایک فتنہ ہے اس کا سر کچلنا چاہیے جس کے بعد پاکستان کے مقبول ترین لیڈر کو قتل کرنے کی کوشش کی جاتی ہے۔
فرخ حبیب نے کہا کہ پاکستان کی عوام اب کسی صورت پیچھے ہٹنے والی نہیں ہے، عمران خان پرحملہ 22کروڑ عوام پر حملہ کے مترادف ہے۔
اس موقع پر سابق گورنر اور مشیرداخلہ پنجاب عمر سرفراز چیمہ نے کہا کہ عمران خان پر حملے کی ابتدائی رپورٹ کے مطابق ایک سے زیادہ افراد نے حملہ کیا۔
انہوں نے بتایا کہ عمران خان کی زیرصدارت ایک اجلاس ہوا، اجلاس میں عمران خان پر حملے کی فرانزک رپورٹ پیش کی گئی، فرانزک رپورٹ کے مطابق دو حملہ آور تھے۔
مشیرداخلہ پنجاب کا کہنا تھا کہ یہ جوبیانیہ بنانے کی کوشش کی جارہی تھی کہ ملزم کوئی جنونی شخص تھا وہ تو ختم ہوگیا، وزیرآباد حملے کے بعد حافظ آباد میں ن لیگی علاقائی رہنماؤں نے جو کہا وہ سب کے سامنے ہے۔
