اسلام آباد: فناننشل ایکشن ٹاسک فورس (ایف اے ٹی ایف) کا افتتاحی اجلاس آج پیرس میں ہوگا، گرے لسٹ نکلنے کے لیے پاکستان کو 15 ووٹ درکار ہیں۔
تفصیلات کے مطابق ایف اے ٹی ایف کا افتتاحی اجلاس آج پیرس میں ہوگا، اجلاس میں شرکت کے لیے پاکستانی وفد وفاقی وزیر اقتصادی امور حماد اظہر کی قیادت میں پیرس پہنچ گیا، وفد میں وزارت خزانہ، اسٹیٹ بینک، ایف ایم یو کے حکام شامل ہیں۔
فنانشنل ایکشن ٹاسک فورس کا باقاعدہ اجلاس کل سے شروع ہوگا جو 5 روز تک جاری رہے گا۔
ذرائع کا کہنا ہے کہ پاکستان نے ایکشن پلان پر عملدرآمد میں ٹھوس پیش رفت کی ہے، پاکستان نے منی لانڈرنگ، ٹیررفنانسنگ کے خطرات پر قابو پایا ہے۔
ذرائع کے مطابق پاکستان کو بلیک لسٹ میں شامل کیے جانے کا کوئی امکان نہیں ہے، پاکستان کو بلیک لسٹ میں ڈالنے کی کوشش ناکام بنانے کے لیے درکار 3 ووٹ موجود ہیں۔
پاکستان نے گرے لسٹ سے نکلنے کے لیے بھرپور سفارت کاری کی ہے جبکہ گرے لسٹ سے نکلنے کے لیے پاکستان کو 15 ووٹ درکار ہیں۔
واضح رہے کہ ایف اے ٹی ایف اجلاس میں پاکستان کا نام گرے لسٹ سے نکلنے یا برقرار رکھنے سے متعلق فیصلہ ہوگا، ایف اے ٹی ایف نے پاکستان کو جون 2018 میں گرے لسٹ میں شامل کیا تھا۔
یاد رہے کہ ترک صدر رجب طیب اردوان نے دورہ پاکستان کے دوران کہا تھا کہ ایف اے ٹی ایف اجلاس میں پاکستان کی حمایت کریں گے۔
