نوجوانی میں اپنا خواب پورا نہ کر پانے والے باپ نے علم حاصل کرنے کے شوق میں بیٹی کے ہمراہ یونیورسٹی میں داخلہ لے لیا۔
لگن سچی ہو تو علم حاصل کرنے کی کوئی عمر نہیں ہوتی، اس کی مثال مصری شہری عبدہ حسن ہیں جنھوں نے نہایت ہمت افزا فیصلہ کیا، مصر کی کمشنر دمیاط میں رہنے والے 50 سالہ حسن نے انٹر کا امتحان پاس کرنے کے بعد بیٹی کے ساتھ یونیورسٹی میں داخلہ لیا۔
عبدہ حسن کے مطابق انھیں تعلیم حاصل کرنے کا بڑا شوق تھا تاہم حالات کی وجہ سے میٹرک کے بعد وہ یہ سلسلہ برقرار نہ رکھ سکے، تاہم بیٹی کے لیے انھوں نے کوئی دقیقہ فروگزاشت نہیں رکھا اور بیٹی کو اعلیٰ تعلیم کے زیور سے آراستہ کرنے کے لیے بہترین کوشش کی۔
مصری شہری نے بتایا کہ جب بیٹی نے میٹرک کیا تو میں نے سوچا کہ بیٹی کےساتھ کالج میں داخلہ لے لوں، اس طرح دونوں نے ایک ہی کالج میں داخلہ لیا۔
دلچسپ بات یہ ہے کہ انٹر کے سالانہ امتحان میں والد نے بیٹی سے زیادہ نمبر لیے، والد کے 79 فیصد نمبر آئے جبکہ بیٹی کے نمبر71 فیصد تھے۔
عبدہ حسن بیٹی نے یونیورسٹی میں صحافت کے شعبے کا انتخاب کیا جبکہ والد کی دلچسپی تاریخ میں تھی، دونوں باپ بیٹی ایک ساتھ ہی یونیورسٹی جاتے ہیں جو کئی لوگوں کے ہمت اور لگن کی مثال ہے۔
