کراچی: شہر قائد کے علاقے فیڈرل بی ایریا میں ایک شخص متعدد گولیاں لگنے سے جاں بحق ہو گیا ہے، بتایا گیا ہے کہ مقتول اپنی بیٹی اور داماد کے درمیان صلح کرانے کے لیے گیا تھا۔
سمن آباد تھانے میں بیٹے کی مدعیت میں درج ہونے والی ایف آئی آر کے مطابق مقتول حسنین مرزا صلح کے لیے فیڈرل بی ایریا میں بیٹی اور داماد کے گھر گیا تھا، تاہم بات چیت کے دوران داماد نے فائرنگ کر کے سسر کو قتل کر دیا۔
پولیس حکام کے مطابق مقتول کی بیٹی نے شوہر سے لڑائی ہونے پر اپنے باپ کو بلوایا، بات چیت کے دوران مقتول کی داماد سے تلخ کلامی ہو گئی، تو ملزم یعقوب نے فائرنگ کر دی۔
یعقوب نے نائن ایم ایم پستول سے 4 گولیاں چلائیں، جن میں سے 3 مقتول کو لگیں، جس کی وجہ وہ موقع ہی پر جاں بحق ہو گئے۔
پولیس رپورٹ میں کہا گیا ہے کہ دونوں میاں بیوی یعقوب اور اعجاز فاطمہ کے درمیان جھگڑا رہتا تھا، جب کہ ملزم نشے کا عادی اور بیوی کو مارتا پیٹتا تھا۔
