نیو یارک : امریکہ میں ایک دفتر میں ہونے والی فائرنگ کے نتیجے میں ایک باپ نے اپنے تین بچوں کو گولیوں سے بچالیا لیکن وہ خود زخمی ہوگیا۔
تفصیلات کے مطابق امریکہ کے شہر نیو یارک میں ایک باپ کی اپنے بچوں پر شفقت دیکھ کر ویڈیو دیکھنے والوں کی آنکھیں نم ہوگئیں، ویڈیو سوشل میڈیا پر وائرل ہوگئی۔
غیر ملکی ذرائع ابلاغ کے مطابق نیو یارک کے علاقے میں قائم ایک کار ڈیلر کے دفتر میں ایک 39سالہ شخص اپنے تین بچوں کے ساتھ موجود تھا کہ اس دوران تین نقاب پوش مسلح افراد نے فائرنگ شروع کردی۔
پولیس کی جاری کردہ ویڈیو میں دکھایا گیا ہے کہ جب فائرنگ شروع ہوتی ہے تو والد اپنے بچوں کو زمین پر دھکیل دیتا ہے اور انہیں اپنی آغوش میں لے کر زمین پر لیٹ جاتا ہے،اس دوران فائرنگ کا سلسلہ بھی جاری رہتا ہے۔
🚨WANTED for ASSAULT: On 9/21/20 at approx 7:20 PM, inside of 4077 Boston Rd in the Bronx, 3 suspects fired multiple shots at a male who then returned fire, striking a male bystander who was attempting to shield his 3 kids. Any info, call or DM @NYPDTips at 800-577-TIPS. pic.twitter.com/0CMcWsXt1m
— NYPD NEWS (@NYPDnews) September 22, 2020
ویڈیو میں دکھایا گیا ہے کہ ایک گولی باپ کی ٹانگ پر بھی لگ جاتی ہے پر وہ ہمت نہیں ہارتا اور بچوں کو محفوظ رکھنے کیلئے انہیں خود میں سموئے رکھتا ہے۔
پولیس کا کہنا ہے کہ باپ کو دائیں ران میں گولی لگی اسے طبی امداد کیلیے مقامی اسپتال منتقل کیا گیا تاہم اب اس کی حالت خطرے سے باہر ہے اور واقعہ میں اس کا کوئی بچہ زخمی نہیں ہوا۔
ڈبلیو سی بی ایس کے مطابق تفتیش کاروں کا کہنا ہے کہ فائرنگ کا تعلق جرائم پیشہ گینگ سے تھا، ملزمان مبینہ طور پر ایک کار کو چوری کرکے فرار ہونے کی کوشش کررہے تھے، پولیس حکام ان ملزمان کی گرفتاری کیلئے کارروائی کررہی ہے۔
