88واں یوم پیدائش، گوگل نے اپنا ڈوڈل فاطمہ ثریا بجیا کی تصویر سے مزین کردیا -
The news is by your side.

Advertisement

88واں یوم پیدائش، گوگل نے اپنا ڈوڈل فاطمہ ثریا بجیا کی تصویر سے مزین کردیا

کراچی: اردو کی معروف مصنفہ فاطمہ ثریا بجیا کے 88 ویں یوم پیدائش پر گوگل نے انہیں شاندار خراج عقیدت پیش کیا ہے، گوگل نے اپنا ڈوڈل بجیا کی تصویر سے مزین کردیا۔

تفصیلات کے مطابق ادب کی دنیا میں عہد کا درجہ رکھنے والی فخر پاکستان فاطمہ ثریا بجیا کی آج88ویں سالگرہ ہے اس موقع پر گوگل انتظامیہ نے انہیں زبردست خراج عقیدت پیش کرتے ہوئے گوگل کا ڈوڈل ان کی خوبصورت تصویر سے مزین کردیا۔

برصغیر کی یہ نامور ادیبہ یکم ستمبر1930 کو حیدر آباد دکن میں پیدا ہوئیں، فاطمہ ثریا بجیا پاکستان ٹیلی وژن اور ادبی دنیا کی معروف شخصیت ہیں، ان کا نام ناول نگاری اورڈرامہ نگاری کے حوالے سے بھی مشہور ہے۔

انہوں نے ٹیلی وژن کے علاوہ ریڈیو اور اسٹیج کے لئے بھی کام کیا۔ محترمہ فاطمہ ثریّا بجیا کا خاندان بھی ادبی دنیا میں ایک نمایاں مقام رکھتا ہے۔

ان کا تعلق ایک تعلیم یافتہ ادبی گھرانے سے ہے، ان کے نانا مزاج یار جنگ اپنے زمانے کے معروف شعراء میں شمار ہوتے تھےجبکہ ان کے والد قمر مقصود حمیدی علی گڑھ مسلم یونیورسٹی سے فارغ التحصیل تھے۔

ان کے خانوادے میں زہرا نگاہ، احمد مقصود حمیدی، انورمقصود ، سارہ نقوی اور زبیدہ طارق شامل ہیں جو اپنے اپنے شعبوں کے نمایاں افراد میں شمار ہوتے ہیں۔

محترمہ فاطمہ ثریا بجیا نے 1965ء کی جنگ کے دوران مقبول ہونے والے جنگی ترانوں کا مجموعہ جنگ ترنگ کے نام سے مرتب کیااور پاکستان ٹیلی وژن کے لیے لاتعداد ڈرامہ سیریل تحریر کیے جن میں اوراق، شمع، افشاں، عروسہ، اساوری، گھراک نگر، آگہی، انا، کرنیں، بابر اور آبگینے کے نام سرفہرست ہیں۔

Comments

comments

یہ بھی پڑھیں