لاہور: تحریک انصاف کے مرکزی رہنما فواد چوہدری نے کہا کہ استعفے منظور نہیں کرتے تو سپریم کورٹ جانا پڑے گا۔
تحریک انصاف کے مرکزی رہنما فواد چوہدری زمان پارک میں سابق وزیر اعظم عمران خان سے ملاقات کے بعد میڈیا سے گفتگو میں کہا کہ استعفوں کی تصدیق کیلئے قومی اسمبلی جانا چاہتے ہیں تو اسپیکر بھاگ جاتے ہیں۔
فواد چوہدری نے کہا کہ اسپیکر کہہ رہے ہیں میں لاڑکانہ میں ہوں، اطلاعات آ رہی ہیں اس کے بعد وہ آسٹریلیا جارہے ہیں، استعفے منظور نہیں کرتے تو سپریم کورٹ جانا پڑے گا۔
پی ٹی آئی رہنما نے کہا کہ شدید دھند میں 100 ارکان اسمبلی اسلام آبادگئے تو یہ فرار ہوگئے، اسپیکر کو کہوں گا استعفے ہمارا آئینی حق ہے قبول کریں اور ملک میں الیکشن کرائیں۔
فواد چوہدری نے اسلام آباد کے بلدیاتی الیکشن ملتوی ہونے کے بارے میں میں کہا کہ جو حکومت بلدیاتی الیکشن کرانے کیلئے تیار نہیں وہ عام انتخابات کیا کرائےگی۔