اسلام آباد : تحریک انصاف کے مرکزی رہنما فواد چوہدری نے کہا ہے کہ فیض آباد دھرنا کے معاملے کو حکومت کو خود ہی حل کرنا چاہئے تھا، مسئلے کاحل ادارے نکال رہےہیں، حکومت مفلوج ہوچکی ہے اسے پاک فوج کا شکریہ ادا کرنا چاہیئے۔
ان خیالات کا اظہار انہوں نے اے آر وائی نیوز سے خصوصی گفتگو کرتے ہوئے کیا، انہوں نے کہا کہ اس معاملے میں آرمی کا کردار نہیں ہونا چاہیے تھا، حکومت خود اس معاملے کو حل کرتی۔
دھرنا سولہ روزسے جاری تھا اور حکومتی ارکان ایک دوسرے کا منہ دیکھ رہے تھے،حکومتی وزراء کو سمجھ ہی نہیں آرہا تھا کہ آخر کرنا کیا ہے؟
آپریشن کے معاملے پر سابق اور موجودہ وزیر داخلہ کا بحران بھی دیکھا گیا، حکومتی نااہلی کے سبب ایسے معاملات ادارے ٹھیک کررہے ہیں۔
ان کا کہنا تھا کہ اتنا بڑا سیاسی خلا تھا کسی کو تو آکر اس کو پُر کرنا تھا، پوری دنیا میں ہمارا مذاق بن گیا، اگر خدانخواستہ معاملات بگڑ جاتے تو اس خون خرابہ اور فسادات کا ذمہ دار کون ہوتا؟
مزید پڑھیں: دھرنا ، حکومت مسائل سنجیدگی سے حل کرے، فواد چوہدری
فواد چوہدری نے مزید کہا کہ حکومت اس وقت تنہا کھڑی ہے کوئی سیاسی قوت اس کے ساتھ نہیں اور نہ ہی وہ نئے الیکشن کرانا چاہتی ہے، کوئی فیصلہ ان سے نہیں ہورہا۔
حکمرانوں کو صرف اپنے پروٹوکول کی فکر ہے، ان کا کہنا تھا کہ اس معاملے کو خوش اسلوبی سے حل کرنے پر حکومت کو پاک فوج کا شکریہ ادا کرنا چاہیئے۔
