اسلام آباد: فوادچوہدری کو وفاقی وزارت اطلاعات کا قلمدان دیدیاگیا جبکہ شبلی فراز کو بھی وزارت مل گئی ہے۔
تفصیلات کے مطابق وفاقی وزیر فواد چوہدری نے وزارت سائنس اینڈ ٹیکنالوجی کا چارج چھوڑ کر وزارت اطلاعات کا چارج سنبھال لیا ہے، فواد چوہدری کی وزارت اطلاعات میں واپسی کا نوٹیفکیشن جاری کردیا گیا ہے۔
ذرائع کا کہنا ہے کہ سینیٹر شبلی فراز کو وفاقی وزیر برائے سائنس اینڈ ٹیکنالوجی کی وزارت تفویض کردی گئی ہے اور وہ جلد بطور وفاقی وزیر عہدے کا حلف اٹھائیں گے۔
اس سے قبل وفاقی وزیر فواد چوہدری نے وزیراعظم عمران خان سے ملاقات کی، ملاقات میں وفاقی وزیر کو وزارت اطلاعات و نشریات کی ذمہ داریاں دینے سے متعلق گفتگو کی گئی، وزیراعظم نے فواد چوہدری کو گائیڈ لائنز فراہم کیں۔
گذشتہ روز وزیراعظم عمران خان نے سرگودھا میں میڈیا سے گفتگو کرتے ہوئے کہا تھا کہ وفاقی کابینہ میں 3،2 تبدیلیاں کچھ روز میں ہو جائیں گی۔
دوسری جانب وزیراعظم کے معاون خصوصی برائے سیاسی ابلاغ شہبازگل نے ٹوئٹ کرتے ہوئے بتایا کہ وزیراعظم نےفواد چوہدری کو وزارت اطلاعات ونشریات کاقلمدان سونپ دیا ہے۔
اپنے ٹوئٹ میں شہبازگل نے لکھا کہ یقیناً یہ ایک بہترین انتخاب ہے، فوادچوہدری سیاسی شعور، ذہانت،عوامی اسٹائل کی وجہ سےمقبول شخصیت ہیں۔
وزیراعظم پاکستان نے آج فواد چوہدری صاحب کو باضابطہ طور پر وزارت اطلاعات و نشریات کا قلمدان سونپ دیا۔ یقیناً یہ ایک بہترین انتخاب ہے۔ فواد چوہدری اپنےسیاسی شعور، ذہانت اور عوامی سٹائل کی وجہ سے عوام میں ایک مقبول شخصیت ہیں-اللہ انکا حامی و ناصر ہو۔آمین @fawadchaudhry @PakPMO
— Dr. Shahbaz GiLL (@SHABAZGIL) April 15, 2021
سال دو ہزار اٹھارہ میں تحریک انصاف کی حکومت بننے کے بعد فواد چاہدری کو وزیر اطلاعات ونشریات مقرر کیا گیا تھا تاہم اپریل 2019 میں وزارت واپس لے لی گئی تھی۔