اسلام آباد : سابق وفاقی وزیر فواد چوہدری اڈیالہ جیل سے رہائی کے بعد گھر پہنچ گئے، والد کو دیکھتے ہی بیٹیاں خوشی سے لپٹ گئیں۔
تفصیلات کے مطابق سابق وفاقی وزیر فواد چوہدری اڈیالہ جیل سے رہائی کے بعد گھر پہنچ گئے، فواد چوہدری کے والد اور بیٹیوں نے گھر آمد پر استقبال کیا اور بیٹیاں والد کو دیکھ کردوڑی چلی آئیں اورگلے لگ گئیں۔
اسلام آباد ہائیکورٹ نے نیب کیس میں فواد چوہدری کی ضمانت پر رہائی کا حکم دیا تھا، جس کے بعد اڈیالہ جیل سے فواد چوہدری کی رہائی عمل میں آئی۔
یاد رہے 2 روز قبل فواد چوہدری کی قبل ضمانت منظور ہوئی تھی ، فوادچوہدری پرنجی ہاؤسنگ سوسائٹی سے کروڑوں روپے رشوت وصولی کا الزام تھا۔
دوران سماعت چیف جسٹس عامر فاروق نے استفسار کیا تھا کہ نیب نے شواہد کے لئے بعد میں لکھا اور بندہ پہلے گرفتار کرلیا؟ نیب کے پاس فواد چوہدری کے خلاف سب سے مرکزی شواہد کیا ہیں؟
جس پر نیب پراسیکیوٹر کے سپریم کورٹ کے فیصلے کا حوالہ دینے پر چیف جسٹس عامر فاروق برہم ہو گئے تھے، چیف جسٹس نے کہا تھا کہ سپریم کورٹ کو چھوڑیں، پہلے شواہد تو بتائیں۔
