پاکستان تحریک انصاف کے رہنما وسابق وفاقی وزیر فواد چوہدری نے کہا ہے کہ حمزہ شہباز کا حلف فوری ختم کیا جائے تاکہ معاملات کشیدہ نہ ہوں۔
پی ٹی آئی رہنما وسابق وفاقی وزیر فواد چوہدری نے سماجی رابطوں کی ویب سائٹ ٹوئٹر پر ٹوئٹ کرتے ہوئے کہا ہے کہ گورنرہاؤس لاہورپرغیر قانونی قبضے کی سخت مذمت کرتا ہوں، صوبائی انتظامیہ نے آئین اور قانون کی صریحاً خلاف ورزی کی ہے۔
فواد چوہدری نے اپنے ٹوئٹ میں کہا کہ حمزہ شہباز کا حلف فوری ختم کیا جائے تاکہ معاملات کشیدہ نہ ہوں۔
گورنر ہاؤس لاہور پر غیر قانونی قبضے کی سخت مذمت کرتا ہوں صوبائ انتظامیہ نے اس ضمن میں آئین اور قانون کی صریحاً خلاف ورزی کی حمزہ شہباز کا حلف فوری ختم کیا جائے تاکہ معاملات کشیدہ نہ ہوں #امپورٹڈ_حکومت_نامنظور
— Ch Fawad Hussain (@fawadchaudhry) April 30, 2022
علاوہ ازیں فواد چوہدری نے اے آر وائی نیوز سے گفتگو کرتے ہوئے کہا کہ آدھی رات کو فیصلہ آیا کہ الیکشن ہوگا، چیف جسٹس نوٹس لیں، معاملے کو دیکھیں۔
انہوں نے کہا کہ گورنر پنجاب نے وزیراعلیٰ کا استعفیٰ مسترد کردیا ہے اس سے قبل ن لیگ والوں نے بھی کہا تھا وزیراعلیٰ کا استعفیٰ غیرقانونی ہے، اس وقت آئینی بحران پیدا ہوگیا ہے کیا وزیراعلیٰ، اسمبلی اور عوام کو بائی پاس کیا جاسکتا ہے۔
فواد چوہدری نے مزید کہا کہ انہوں نے گورنر ہاؤس پر قبضہ کرکے نجی تقریب حلف برداری کی، ایسے مینڈیٹ اور حلف کو کون مانے گا۔
انہوں نے کہا کہ انٹراکورٹ اپیل کی تو پتا چلا جج صاحب نہیں ہیں، حلف کے بعد اپیل سنی جارہی ہے اس کا کیا فائدہ، ایک کےلیے 24 گھنٹے عدالتیں کھلی ہیں ایک کے لیے بند، یہ سمجھ نہیں رہے پاکستان کس بحران کے دہانے پر کھڑا ہے، لوٹوں کے کیس کو سنا نہیں جارہا جوکہ سارے مسائل کی جڑ ہے۔
فواد چوہدری نے کہا کہ کچھ کیسز کو تیزی سے سنا جارہا ہے کچھ پر فیصلے نہیں ہو رہے اور یہ سب جس طرح سے ہورہا ہے مجھے لگتا ہے کہ ہماری عدالتیں رینکنگ میں آخری نمبر پر پہنچ جائیں گی۔