The news is by your side.

Advertisement

تنظیم سازی رات 3 بجے ہو تو ہڈیاں ہی ٹوٹتی ہیں، فیاض الحسن چوہان

راولپنڈی: وزیر اطلاعات پنجاب فیاض الحسن چوہان نے کہا ہے کہ طلال چوہدری نے ن لیگ اور پوری سیاست کا سر شرم سے جھکا دیا ہے، تنظیم سازی رات 3 بجے ہو تو ہڈیاں ہی ٹوٹتی ہیں۔

اے آر وائی نیوز کی رپورٹ کے مطابق وزیر اطلاعات پنجاب فیاض الحسن چوہان نے نیوز کانفرنس کرتے ہوئے کہا کہ طلال چوہدری کی تمام فوٹیج خاتون ایم این اے کے گھر کے اندر کی ہے، انہوں نے ایک نہیں تمام منتخب نمائندوں پر حملہ کیا ہے۔

فیاض الحسن چوہان کے مطابق پولیس کو 15 پر دونوں اطراف سے کال کی گئیں، اگر کچھ نہیں ہوا تو جعلی کال پر دونوں کے خلاف قانونی کارروائی کی جاسکتی ہے، پولیس سے تعاون نہیں کریں گے تو دونوں کے خلاف کارروائی ہوگی۔

مزید پڑھیں:عائشہ رجب سے تنازع طلال چوہدری کو مہنگا پڑ گیا

انہوں نے کہا کہ پنجاب حکومت نے اس واقعے کی تحقیقاتی کمیٹی بنادی ہے جس نے کام شروع کردیا ہے، انویسٹی گیشن کمیٹی جو رپورٹ دے گی اس پر کارروائی ہوگی، معاملہ ختم نہیں ہوگا۔

صوبائی وزیر نے کہا کہ رات کے 3 بجے تنظیم سازی طلال چوہدری نے ایجاد کی ہے، انہوں نے اب اپنی پارٹی کی ایم این اے کو ہراساں کرنا شروع کردیا ہے۔

فیاض الحسن چوہان نے کہا کہ حکومت پانچ سال پورے کرے گی، جب بھی اپوزیشن استعفے دے گی ضمنی انتخابات کرادئیے جائیں گے، مہنگائی پر جلد قابو پالیں گے، مہنگائی کے سوا ہمارا کوئی منفی پوائنٹ نہیں یہ بھی جلد ختم ہوگی۔

Comments

یہ بھی پڑھیں