ایف بھی آر نے ٹیکس کے نام پر اوور سیز پاکستانی رانا محمد ریاض کا اکاؤنٹ خالی کردیا متاثرہ شخص نے پاکستان سٹیزن پورٹل پر شکایت درج کرا دی۔

اے آر وائی نیوز کے مطابق اوور سیز پاکستانی رانا محمد ریاض نے پاکستان سٹیزن پورٹل پر شکایت درج کرائی ہے جس میں کہا گیا ہے کہ ایف بی آر نے ٹیکس کے نام پر ان کا اکاؤنٹ خالی کردیا۔

امریکا میں مقیم متاثرہ پاکستانی نے اپنی شکایت میں انکشاف کیا ہے کہ ان کے اکاؤنٹ سے بغیر کسی نوٹس کے غلط معلومات پر 27 لاکھ سے زائد رقم نکلوائی گئی۔

شکایت کنندہ کا کہنا ہے کہ وہ 3 دہائیوں سے امریکا میں مقیم ہیں اور ان کا پاکستان میں کوئی کاروبار بھی نہیں ہے۔ ٹیکس نوٹس پر دیا گیا پتہ بھی درست نہیں ہے۔

رانا محمد ریاض نے پاکستان سٹیزن پورٹل پر شکایت درج کرانے کے ساتھ وزیراعظم شہباز شریف اور چیئرمین ایف بی آر سے اس معاملے کا نوٹس لینے کا بھی مطالبہ کیا ہے۔