اسلام آباد : فیڈرل بورڈ آف ریونیو (ایف بی آر) نے رواں سال فروری2023کا ریونیو ہدف کامیابی سے حاصل کرلیا ہے جو گزشتہ سال کے مقابلے میں 16 فیصد زائد ہے۔
اس حوالے سے ترجمان ایف بی آر نے بتایا ہے کہ ادارے نے527ارب کے ہدف کے مقابلے میں527.3ارب اکٹھے کیے، رواں ماہ کا ریونیو پچھلے سال کے مقابلے میں16.3فیصد زیادہ ہے۔
ایف بی آر نے رواں مالی سال کے پہلے8ماہ میں4,493ارب کاریونیو اکٹھا کیا، گزشتہ سال کے پہلے8ماہ میں3,820ارب روپے اکٹھے کیے گئے تھے جبکہ رواں مالی سال کے پہلے8ماہ میں براہ راست ٹیکسسز وصولی میں47فیصد اضافہ ہوا۔
ترجمان ایف بی آر کے مطابق ماہ فروری2023میں کسٹمز ڈیوٹی کی وصولی میں2فیصد اضافہ ہوا، برآمد کنندگان کی سہولت کیلئے مالی سال کے8ماہ میں235ارب کے ریفنڈز جاری کئے گئے، گزشتہ سال کے پہلے8ماہ میں198 ارب روپے کےریفنڈزجاری کئے گئے تھے، اقتصادی چیلنجزکے باوجود ایف بی آر7،641ارب کے سالانہ ریونیو ہدف کیلئے پُرعزم ہیں۔
واضح رہے کہ گزشتہ ماہ 14 فروری کو ایف بی آر نے سیلز ٹیکس کی شرح 17 فیصد سے بڑھا کر 18 فیصد کر دی تھی لیکن گزشتہ 14 روز سے اس اضافے کے اثرات کا تاحال تخمینہ نہیں لگایا جا سکا ہے۔
اسی طرح سگریٹ پر ایکسائز ڈیوٹی میں بھی نمایاں اضافہ کیا گیا ہے، ان دونوں اقدامات سے ساڑھے 3 ماہ میں آمدنی کا تخمینہ 115 ارب روپے لگایا گیا ہے۔
