اسلام آباد : وفاقی کابینہ نے سعودی عرب کیساتھ کسٹمز امور میں تعاون کے معاہدے کی منظوری دے دی، جس کے تحت دونوں ممالک میں کسٹمز سے متعلق امور میں تعاون اور باہمی معاونت ہوگی۔
تفصیلات کے مطابق حکومت کی جانب سے ٹیکس چوری،کمرشل فراڈ،ممنوعہ اشیااور منی لانڈرنگ روکنے کے لیے اقدامات جاری ہے۔
ذرائع نے بتایا کہ کابینہ نے سعودی عرب کیساتھ کسٹمز امور میں تعاون کےمعاہدے کی منظوری دے دی ، وفاقی کابینہ سے سرکولیشن کے ذریعے سمری کی منظوری لی گئی۔
ذرائع کا کہنا تھا کہ دونوں ممالک میں کسٹمز سے متعلق امور میں تعاون اور باہمی معاونت ہوگی ، سعودی عرب کیساتھ معاہدہ کئی حوالوں سے پاکستان کیلئے فائدہ مند ہوگا۔
حکومتی ذرائع نے کہا ہے کہ معاہدے سے ٹیکس اور ڈیوٹیز کی چوری کے خطرات کم ہوں گے۔
معاہدے سے متعلق بین الوزارتی مشاورتی عمل مکمل کیا گیا، اس حوالے سے وزارت داخلہ،دفاع،تجارت ،وزارت خارجہ سے مشاورت کی گئی جبکہ وزارت قانون و انصاف سے معاہدے کے مسودے کی توثیق بھی کرائی گئی۔
