اسلام آباد: سپریم کورٹ کے حکم کی روشنی میں ملک کے 4 بڑے اسپتالوں کو وفاق کے زیر انتظام کرنے کا عمل شروع ہوگیا۔
تفصیلات کے مطابق سپریم کورٹ کی جانب سے جناح اسپتال ،این آئی سی وی ڈی، این آئی سی ایچ اور شیخ زید اسپتال کو وفاق کے تحت چلانے کے فیصلے پر عمل کرتے ہوئے وزارت صحت نے مذکورہ اسپتالوں کا ریکارڈ طلب کرلیا ہے۔
وزارت صحت نے انتظامی کنٹرول کیلئےاسپتالوں کے اثاثوں، ملازمین اور بجٹ کی تفصیلات مانگ لیے ہیں۔
یہ بھی پڑھیں: وفاقی اسپتالوں کی صوبوں کو متقلی غیر آئینی قرار، سپریم کورٹ کا تفصیلی فیصلہ
سپریم کورٹ نے جناح اسپتال (جے پی ایم سی) اور این آئی سی وی ڈی کی سندھ کو منتقلی غیر آئینی قرار دیتے ہوئے این آئی سی ایچ اور این ایم پی کی صوبے کو منتقلی بھی غیر آئینی قرار دیا تھا۔
فیصلہ کے مطابق سندھ اسمبلی کا منظور شدہ این آئی سی وی ڈی ایکٹ2014 غیر آئینی ہے، اس کے علاوہ شیخ زید اسپتال لاہور کی صوبائی حکومت کو منتقلی غیر آئینی قرار دیتے ہوئے کہا گیاکہ شیخ زید اسپتال صوبے کو دینے کا فیصلہ وزیراعظم نے کیا تھا کابینہ نے نہیں۔
فیصلہ میں مزید کہا گیا کہ این آئی سی ایچ1990میں جے پی ایم سی سے الگ ہوکر وفاق کو منتقل ہوا، اٹھارہویں ترمیم عمل درآمد کمیشن نے اپنی حدود سے تجاوز کیا تھا، جے پی ایم سی اور این آئی سی وی ڈی کا وفاقی ادارے ہونا پہلے سے تسلیم شدہ ہے۔
