اسلام آباد: ڈاکٹر عافیہ صدیقی پر دوران قید ساتھی قیدی کے حملے پر دفتر خارجہ نے رد عمل میں کہا ہے کہ پاکستانی سفارت خانے نے امریکی حکام سے یہ معاملہ اٹھایا ہے۔
تفصیلات کے مطابق ترجمان دفتر خارجہ نے ڈاکٹر عافیہ صدیقی کے حوالے سے ردِ عمل میں کہا ہے کہ 30 جولائی کو عافیہ صدیقی پر ساتھی قیدی کے ذریعے حملے کے بارے میں معلوم ہوا، واشنگٹن میں ہمارے سفارت خانے نے امریکی حکام سے یہ معاملہ اٹھایا۔
ترجمان دفتر خارجہ نے کہا کہ واقعے کے بعد پاکستانی قونصل جنرل نے عافیہ صدیقی سے ملاقات کی ہے، انھیں کچھ معمولی چوٹیں آئیں، لیکن وہ ٹھیک ہو رہی تھیں، متعلقہ امریکی حکام کو اس سلسلے میں شکایت درج کرا دی گئی ہے۔
ڈاکٹر عافیہ صدیقی کا پاکستانی قونصلر جنرل سے ملاقات سے انکار، رپورٹ میں انکشاف
ترجمان کے مطابق امریکی حکام کے ساتھ واقعے کی مکمل تحقیقات اور عافیہ صدیقی کی حفاظت یقینی بنانے کی بات کی گئی، ترجمان نے کہا کہ قونصل جنرل کی ہر ممکن کوشش ہے کہ عافیہ صدیقی کی مناسب طریقے سے دیکھ بھال ہو۔
