امریکی ٹی وی چینل کی خاتون صحافی براہ راست نشریات کے دوران موسم کی خبریں سناتے ہوئے اچانک زمین پر گر پڑیں۔
سوشل میڈیا ویب سائٹس پر جاری ویڈیو میں دیکھا جاسکتا ہے کہ ایک خاتون ماہر موسمیات الیسا کارلسن شوارزٹ ٹی وی نیوز بلیٹن میں اپنا بیپر دینے سے قبل اچانک بے ہوش ہو کر گرگئیں، زمین پر گرنے سے پہلے خاتون کی آنکھیں چکرائیں پھر ان کی ٹانگوں نے کام کرنا چھوڑ دیا، اس کے بعد وہ بے سُدھ ہوکر اپنی کرسی سے گر پڑیں۔
تفصیلات کے مطابق امریکی ٹی وی چینل سی بی این کی براہ راست نشریات جاری تھیں کہ اسی دوران خواتین اینکرز نے موسم کی صورت حال پر تجزیے کے لیے ماہر موسمیات کو مدعو کیا تھا۔
اینکرز ابھی خاتون ماہر موسمیات الیسا کارلسن شوارزٹ کا تعارف ہی کروا رہی تھیں کہ اسی دوران الیسا کی آنکھیں گھوم گئیں، ان کا چہرہ پیلا پڑ گیا اور پتلیاں اوپر کی جانب چلی گئیں، خاتون ماہر موسمیات نے سامنے رکھی میز پر کہنیاں رکھ کر خود کو سنبھالنے کی کوشش کی تاہم وہ خود پر قابو نہ پا سکیں اور بے ہوش ہو کر زمین پر گر گئیں۔
جب پروگرام کی اینکرز کو اندازہ ہوا کہ خاتون ماہر موسمیات کے ساتھ کچھ گڑ بڑ ہوئی ہے تو انہوں نے فوری طور پر بریک لے لی۔ ایک اینکر نے فوری طور پر ایلیسایہ شوارٹز کو زمین سے اٹھایا اور کرسی پر بٹھانے کی کوشش کی۔
یاد رہے کہ یہ پہلی بار نہیں ہوا کہ الیسا کارلسن کی براہ راست نشریات کے دوران طبیعت خراب ہوئی ہو، اس سے قبل بھی ایک بار براہ راست نشریات کے دوران الیسا کو دل کی تکلیف ہوئی تھی۔
