ملتان : جنوبی پنجاب میں کھاد کا بحران شدت اختیار کرگیا، کھاد کی خریداری کے لئے کاشتکار دن بھر خوار ہونے لگے۔
کھادوں کی قیمتیں کم نہ ہونے اور بحران کی وجہ سے مہنگی کھاد خریدنا کاشت کاروں کی مجبوری بن گیا ہے، جس کے باعث کاشتکاروں نے احتجاجی مظاہرے شروع کردیئے ہیں۔
مظاہرین کا کہنا تھا کہ دن بھر لائنوں میں لگ کر بھی کھاد نہیں مل رہی، ہمارے کیلئے کنٹرول قیمت پر کھاد کا حصول ایک خواب بن گیا ہے۔
کسانوں نے کہا کہ کھاد ڈیلرز کنٹرول ریٹس پر کھاد فروخت نہیں کررہے اور انتظامیہ کھاد کی فراہمی کے سلسلے میں بااثر افراد کو ہی نواز رہی ہے۔
ذرائع کے مطابق حکومت نے کھاد کے مصنوعی بحران پر نوٹس لیا لیکن اس کے باوجود جنوبی پنجاب میں تاحال مختلف کھادیں ہی نایاب ہیں جن کی تلاش میں کاشتکاروں کی اکثریت خوار ہو رہی ہے۔
کاشت کاروں نے حکومت سے گندم کی امدادی قیمت مقرر کرنے اور ذخیرہ اندوزوں کیخلاف بڑے پیمانے پر کریک ڈاون کا مطالبہ کیا ہے۔
