کراچی : ایف آئی اے نے منی لانڈرنگ کیس میں ارمغان کی کسٹڈی کیلئے انسداددہشت گردی سے رجوع کرلیا، ملزم کو مصطفیٰ عامر قتل کیس میں گرفتار کیا گیا تھا۔
تفصیلات کے مطابق مصطفیٰ عامر قتل کیس میں گرفتار ملزم ارمغان سے منی لانڈرنگ کیس میں تفتیش کے معاملے پر ایف آئی اے نے انسداد دہشتگردی عدالت سے رابطہ کرلیا۔
ایف آئی اے نے عدالت سے منی لانڈرنگ کیس میں ارمغان کی کسٹڈی کیلئے استدعا کی، جس پر عدالت کا کہنا تھا کہ ملزم کےریمانڈ دینےکا اختیار منتظم عدالت کےپاس ہے
گذشتہ روز مصطفیٰ عامر قتل کیس میں نامزد ملزم ارمغان پر حوالہ ہنڈی اور جعل سازی میں ملوث ہونے پر بھی مقدمہ درج کیا گیا تھا۔
ایف آئی اے اینٹی منی لانڈرنگ سرکل میں مقدمہ سرکار کی مدعیت میں درج کیا گیا، جس میں کہا گیا تھا کہ ملزم حوالہ ہنڈی، کرپٹو کرنسی اور مختلف لین دین کےمعاملات میں ملوث ہے۔
مزید پڑھیں : مصطفیٰ عامر قتل کیس : ارمغان جعلسازی سے ہر ماہ تین سے چارلاکھ ڈالر کماتا تھا
ایف آئی آر کے متن میں کہا گیا تھا کہ ملزم جعلسازی سے ہر ماہ تین سے چارلاکھ ڈالر کماتا اور جعلسازی کے پیسے کرپٹو کرنسی میں تبدیل کرتا تھا، اس کے پاس موجود گاڑیاں کرپٹو کی رقم سے خریدی گئیں۔
مقدمے میں کہنا تھا کہ ارمغان کے کال سینٹر سے امریکا کالزکی جاتی تھیں اور اہم معلومات لینے کے بعد امریکی شہریوں کے اکاؤنٹس سےپیسےنکال لیے جاتے تھے، فراڈ کےذریعے نکالی جانے والی رقم ملزم تک پہنچتی تھی، اُس نے پنے دو ملازمین کے نام پر بینک اکاؤنٹس کھلوائے تھے۔
ایف آئی آر کے مطابق ملزم ارمغان کے پاس کروڑوں مالیت کی تین گاڑیاں موجود اور پانچ وہ فروخت کرچکا ہے جبکہ اس نے والد سے ملکر حوالہ ہنڈی کیلئے امریکا میں ایک کمپنی بھی بنائی تھی۔
