انٹرپول پاکستان نے سعودی عرب سے ملزم کو گرفتار کر کے پاکستان پہنچا دیا

کراچی: ایف آئی اے انٹرپول پاکستان نے سعودی عرب سے ملزم کو گرفتار کر لیا۔

تفصیلات کے مطابق ایف آئی اے NCB انٹرپول پاکستان نے ایک کارروائی میں قتل میں مطلوب ملزم راشد محمود کو سعودی میں گرفتار کر کے پاکستان پہنچا دیا۔

ترجمان ایف آئی اے کا کہنا ہے کہ ملزم راشد محمود قتل کے مقدمے میں تھانہ قلعہ دیدار سنگھ گجرانوالہ پولیس کو مطلوب تھا، ملزم کے خلاف سال 2010 میں قتل کی دفعات کے تحت مقدمہ درج ہوا تھا۔

متعلقہ ضلعی پولیس کی درخواست پر NCB انٹرپول پاکستان نے ریڈ نوٹس جاری کیا تھا۔ گرفتاری کے بعد ملزم کو بین الاقوامی پرواز سے اسلام آباد ایئر پورٹ منتقل کیا گیا۔

ایف آئی اے امیگریشن اسلام آباد نے ملزم کو متعلقہ پولیس کے حوالے کر دیا ہے، ملزم کی حوالگی انٹرپول پاکستان کی انٹرپول سعودی عرب کے ساتھ قریبی رابطہ کاری کی وجہ سے ممکن ہوئی۔

Comments