کراچی: ایف آئی اے انٹرپول پاکستان نے ایک کارروائی میں سنگین جرم میں مطلوب ملزم قربان علی کو ریاض سے گرفتار کر لیا۔
تفصیلات کے مطابق سعودی عرب کے شہر ریاض میں ایف آئی اے انٹرپول پاکستان کے ہاتھوں گرفتار اشتہاری ملزم قربان علی کو اسلام آباد ایئرپورٹ منتقل کر دیا گیا ہے۔
ترجمان ایف آئی اے کے مطابق گرفتار ملزم پنجاب پولیس کو مطلوب تھا، ملزم کے خلاف فیصل آباد تھانے میں قتل کی دفعات کے تحت مقدمہ درج تھا، ایف آئی اے NCB انٹرپول پاکستان نے ملزم کی گرفتاری کے لیے ریڈ نوٹس جاری کیا تھا۔
ملزم کی حوالگی انٹرپول اسلام آباد کی انٹرپول ریاض کے ساتھ قریبی رابطہ کاری کی وجہ سے ممکن ہوئی، بعد ازاں ایف آئی اے امیگریشن نے ملزم کو متعلقہ پولیس حکام کے حوالے کر دیا۔
