اسلام آباد : سابق وزیر خارجہ شاہ محمود قریشی نے کہا ہے کہ سائفر ایک حقیقت ہے اور رہے گی، پی ٹی آئی نے اس کو کبھی سیاسی مقاصد کیلئے استعمال نہیں کیا۔
تفصیلات کے مطابق سابق وزیر خارجہ شاہ محمود قریشی نے سائفر انکوائری ٹیم کو بیان ریکارڈ کرا دیا، ایف آئی اے ہیڈ کوارٹر کے باہر میڈیا سے گفتگو کرتے ہوئے انہوں نے کہا کہ سلامتی کمیٹی کے اجلاسوں میں سائفر کو تسلیم کیا گیا تھا، پی ٹی آئی نے کبھی اسے سیاسی مقاصد کیلئے استعمال نہیں کیا۔
انہوں نے کہا کہ بیانات دیے گئے کہ سائفر دفترخارجہ میں بیٹھ کر من گھڑت طور پر تیار کیا گیا میں پہلے بھی کہہ چکا ہوں اور آج پھر دہرا دیتا ہوں کہ سائفر ایک حقیقت تھی اور ہے، سلامتی کمیٹی کے اجلاسوں میں سائفر کو باقاعدہ طور پر تسلیم کیا گیا۔
ان کا کہنا تھا کہ میں پہلے بھی پیش ہوا تھا جو سوالات کیے دیانت داری سے ان کے جوابات دیے،آج بھی جو سوالات کیے گئے ان پراپنا مؤقف پیش کردیا،
شاہ محمودقریشی نے بتایا کہ سائفر کے معاملے پر سول و ملٹری لیڈر شپ نے اتفاق بھی کیا، سائفر تو آئےدن آتے رہتے ہیں لیکن وہ معمولی نوعیت کا نہیں تھا، مناسب سمجھا گیا کہ اس سائفر پر ایک اجلاس بلایا جائے۔
اس سائفر پر ایک نہیں دو بار اجلاس بلائے گئے، ایک چیئرمین پی ٹی آئی کی زیرصدارت تو دوسرا شہبازشریف کی صدارت میں ہوا، دونوں اجلاسوں میں سائفر کی حقیقت کو من و عن تسلیم کیا گیا اور سیاسی مداخلت کا تاثر سامنے آیا۔
انہوں نے بتایا کہ اس وقت چیئرمین پی ٹی آئی نے کہا بھی تھا کہ سپریم کورٹ کی سربراہی میں آزاد تحقیقات کرالی جائے، اگر ایسا ہوجاتا ہے تو قیاس آرائیوں، بیان بازی کی نوبت ہی نہ آتی،
بلکہ یہ تاثر دینے کی کوشش کی گئی کہ پی ٹی آئی سائفر کو سیاسی طور استعمال کررہی ہے۔
شاہ محمود قریشی کا کہنا تھا کہ پارلیمنٹری کمیٹی اور نیشنل سیکیورٹی کا مشترکہ اجلاس بلایا گیا، اس اجلاس میں تمام جماعتوں کے سربراہوں کو دعوت دی گئی تھی، بدقسمتی سے اس وقت کی اپوزیشن نے اس اجلاس کا بائیکاٹ کیا، کل چیئرمین پی ٹی آئی بھی ایف آئی اے میں خود تشریف لائیں گے۔
اسد عمر نے بھی بیان ریکارڈ کروایا
علاوہ ازیں پی ٹی آئی رہنما اسد عمر نے بھی سائفر تحقیقات میں ایف آئی اے کو بیان ریکارڈ کروا دیا اسد عمر 2گھنٹے سے زائد جوائنٹ انویسٹی گیشن ٹیم کے سامنے موجود رہے، ان کا کہنا تھا کہ قومی سلامتی کے دو اجلاسوں میں جو باتیں ہوئیں سب وہی ہے۔
