کراچی : وفاقی تحقیقاتی ادارے ( ایف آئی اے ) نے 9 مئی کو جلاؤگھیراؤ میں ملوث پی ٹی آئی کے 200سے زائد رہنماؤں اورکارکنوں کے نام ایگزٹ پوائنٹس پرڈال دیے۔
تفصیلات کے مطابق نو مئی کو جلاؤ گھیراؤ میں ملوث تحریک انصاف کے رہنماوں کے گرد گھیرا مزید تنگ کردیا گیا ، دو سو سے زائد اہم رہنماوں اور کارکنوں کے نام ملک کے تمام ایگزٹ پوائنٹس پر فراہم کردئیے گئے۔
ایف آئی اے ذرائع نے بتایا کہ فہرست میں شامل نام مختلف اداروں کو مقدمات میں مطلوب ہیں، ناموں کی فہرست کراچی سمیت تمام ایئرپورٹس، سی پورٹس پر امیگریشن حکام کو فراہم کی گئی ہے۔
فہرست میں موجود افراد کی بیرون ملک روانگی کو ہرصورت روکنے کی ہدایت کی گئی ہے۔
گزشتہ روز ایف آئی اے نے بیرون ملک سے سوشل میڈیا پر ملک مخالف مہم چلانیوالے پاکستانیوں کے نام ای سی ایل میں ڈالنے کا فیصلہ کیا تھا۔
ذرائع ایف آئی اے کا کہنا تھا کہ منفی پروپیگنڈا کرنے والوں کو ریڈ نوٹسز جاری کئے جائیں گے، انٹرپول اور متعلقہ سفارتخانےریڈ نوٹس کے حوالے سے معاونت کریں گے۔
ذرائع کے مطابق بیرون ملک سے منفی پروپیگنڈا کرنا پیکا ایکٹ 2016 کی خلاف ورزی تصور ہوگا۔
