فیفا ورلڈ کپ کے سیمی فائنل میں دفاعی چیمپئن فرانس کی فتح کے ساتھ ہی فینز نے بھرپور جشن منایا صدر میکرون نے اسٹیڈیم میں میچ دیکھا۔
اے آر وائی نیوز کے مطابق قطر میں فیفا ورلڈ کپ کے دوسرے سیمی فائنل میں دفاعی چیمپئن کی جیت کے ساتھ ہی فرانسیسی فینز نے نہ صرف دوحہ میں جشن منایا بلکہ پیرس سمیت فرانس کے دیگر شہروں میں بھی شائقین فٹبال اپنی ٹیم کی جیت کا جشن منانے کے لیے سڑکوں پر نکل آئے۔
فرانسیسی شہریوں نے سڑکوں پر ہلہ گلہ کیا ٹیم کے حق میں نعرے لگائے۔ اس موقع پر شاندار آتشبازی کا مظاہرہ بھی کیا گیا تھا۔
قابل ذکر بات یہ ہے کہ فرانس اور مراکش کا سیمی فائنل دیکھنے کے لیے فرانسیسی صدر میکرون دوحا اسٹیڈیم میں موجود تھے اور انہوں نے میچ کے دوران اپنی ٹیم کو بھرپور انداز میں سپورٹ کیا۔
دوسری جانب مراکش کی شکست پاکستان سمیت دنیا بھر میں مراکش کے فینز کو اداس کرگئی۔ اسٹیڈیم میں موجود مراکش ٹیم کے پرستار بھی اپنے جذبات پر قابو نہ رکھ سکے اور خواتین سمیت سب کی آنکھیں اپنی ٹیم کی شکست پر نم ہوگئیں۔
تاہم مراکشی کھلاڑیوں نے سیمی فائنل میں شکست کے باوجود دل برداشتہ ہونے کے بجائے گراؤنڈ میں سجدہ شکر ادا کرکے لوگوں کے دل جیت لیے جس کی ویڈیو سوشل میڈیا پر وائرل ہوگئی۔
یہ بھی پڑھیں: شکست کے باوجود مراکشی کھلاڑی سجدہ ریز، دلوں کو چھو لینے والی ویڈیو وائرل
جس جس نے بھی اس ویڈیو کو دیکھا وہ مراکشی کھلاڑیوں کے عاجزانہ رویے کو سراہے بغیر نہ رہ سکا۔
