سینٹرل پنجاب ویک اینڈ اسکول چیمپئن شپ 22-2021 کا فائنل 9 اپریل کو قذافی اسٹیڈیم لاہور میں کھیلا جائے گا، جہاں دار ارقم اسکول لاہور اور فیصل آباد کے ڈویژنل پبلک اسکول کی ٹیمیں مدمقابل آئیں گی۔
دو روزہ پنک بال فائنل پی ٹی وی اسپورٹس اور پی سی بی کے یوٹیوب چینل پر براہ راست نشر کیا جائے گا۔ ڈے اینڈ نائٹ میچ کا پہلا سیشن شام 4 سے 6 بجے تک کھیلا جائے گا۔ دوسرا سیشن رات 7:10 سے 9:10 بجے اور تیسرا سیشن 9:30 سے 11:30 تک جاری رہے گا۔
ٹورنامنٹ کی فاتح کو پانچ لاکھ روپے کی رقم دی جائے گی۔ رنرزاپ کو تین لاکھ روپے کا چیک دیا جائے گا۔ اس کے علاوہ، ایونٹ کے بہترین بیٹر، بہترین باؤلر، بہترین آلراؤنڈر اور بہترین وکٹ کیپر کو 25 ہزار روپے کی رقم دی جائے گی۔
ٹورنامنٹ کا آغاز اکتوبر 2021 میں ہوا تھا۔ ایونٹ میں سینٹرل پنجاب کے پانچ اضلاع کی 33 ٹیموں نے شرکت کی تھی۔ 29 مختلف وینیوز پر کھیلے گئے ٹورنامنٹ میں 660 کھلاڑیوں نے شرکت کی۔
