اسلام آباد: وزیراعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ وزیراعظم کی کوششوں سے کشمیریوں کو اسلامی دنیا کی بھرپورتائید ملی۔
تفصیلات کے مطابق سماجی رابطے کی ویب سائٹ ٹویٹر پر فردوس عاشق اعوان نے اپنے پیغام میں کہا کہ وزیراعظم کا دورہ سعودی عرب برادرانہ تعلقات کا مظہر ہے۔
وزیراعظم عمران خان کا دورہ سعودی عرب دونوں ممالک کے مابین بااعتماد برادرانہ تعلقات کا مظہر ہے۔ حالیہ دورے سے دونوں برادر ممالک کے تعلقات مزید مضبوط اور توانا ہوں گے۔وزیراعظم سعودی ولی عہد کے ساتھ مقبوضہ جموں کشمیر کی سنگین صورتحال پر تفصیل سے تبادلہ خیال کریں گے۔
— Firdous Ashiq Awan (@Dr_FirdousPTI) September 19, 2019
انہوں نے کہا کہ حالیہ دورے سے برادرممالک کے تعلقات مزید مضبوط ہوں گے، وزیراعظم سعودی ولی عہد سے مقبوضہ کشمیر پر تفصیلی تبادلہ خیال کریں گے۔
فردوس عاشق اعوان نے کہا کہ برادر اسلامی ملک، او آئی سی کو اعتماد میں لینا کشمیریوں کی آوازمضبوط کرنا ہے، وزیراعظم کی کوششوں سے کشمیریوں کو اسلامی دنیا کی بھرپورتائید ملی۔
معاون خصوصی نے کہا کہ وزیراعظم کا دورہ مختلف شعبوں میں تعلقات کے فروغ کے لیے ایک اور سنگ میل ہوگا۔
انہوں نے کہا کہ سعودی ولی عہد کے دورہ پاکستان سے تاریخی تعلقات میں مزید قربت آئی، پاکستان کےعوام سعودی قیادت سے والہانہ محبت،عقیدت رکھتے ہیں۔
وزیراعظم دو روزہ دورے پر سعودی عرب روانہ
واضح رہے کہ وزیراعظم عمران خان دو روزہ دورے پر سعودی عرب روانہ ہوگئے، وزیراعظم دورے کے دوران سعودی قیادت سے اہم ملاقاتیں کریں گے۔
