لاہور: سابق وفاقی وزیر فردوس عاشق اعوان کا ملازمہ سے مبینہ بدتمیزی کی ویڈیو پر رد عمل سامنے آ گیا۔
تفصیلات کے مطابق ڈاکٹر فردوس عاشق اعوان نے ملازمہ سے مبینہ بدتمیزی کی ویڈیو کے حوالے سے کہا ہے کہ ایک تو یہ کہ ’’سوشل میڈیا پر چلنے والی ویڈیو پرانی ہے، اور پھر کوئی یہ ثابت کر کے دکھائے کہ یہ میری گھریلو ملازمہ ہے۔‘‘
فردوس عاشق کا کہنا تھا کہ یہ چوری کا معاملہ تھا انھوں نے کسی قسم کا تشدد نہیں کیا۔ سابق وفاقی وزیر نے کہا ’’مجھے بلیک میل کرنے کے لیے ویڈیو بھیجی گئی ہے، جس نے یہ ویڈیو بنائی ہے اس کے خلاف ایف آئی اے سائبر کرائم سے رجوع کر لیا ہے۔‘‘
واضح رہے کہ گزشتہ روز فردوس عاشق اعوان کی ملازمہ سے گالم گلوچ کی ویڈیو منظر عام پر آئی تھی، موبائل فون سے بنائی گئی ویڈیو میں فردوس عاشق اعوان ملازمہ پر تشدد کا اعتراف بھی کر رہی ہیں، فردوس عاشق اعوان نے ملازمہ کو گالیاں بھی دیں۔
فردوس عاشق اعوان کا اپنی ملازمہ پر تشدد، ویڈیو سامنے آگئی
ویڈیو میں ایک شخص کو سنا جا سکتا ہے جو فردوس عاشق سے کہتا ہے کہ آپ نے لڑکی کو تھپڑ مارا ہے، فردوس کہتی ہی کہ ہاں اس نے جھوٹ بولا تھا۔ تاہم اب اپنے رد عمل میں انھوں نے تشدد کی تردید کی ہے۔
