جکارتا: انڈونیشیا میں تیل کے گودام میں خوفناک آتش زدگی کے باعث 17 افراد ہلاک ہو گئے۔
تفصیلات کے مطابق جمعہ کو انڈونیشیا کے دارالحکومت کے سرکاری فیول اسٹوریج اسٹیشن میں آگ لگنے سے سترہ افراد ہلاک جب کہ 50 سے زائد افراد زخمی ہو گئے ہیں، علاقے سے ہزاروں افراد کو انخلا بھی کرنا پڑا۔
خوفناک آگ نے گرد و نواح میں واقع رہائشی علاقے کو بھی لپیٹ میں لے لیا، کئی گھر جل کر خاکستر ہو گئے، آگ بھڑکنے کے بعد دھماکوں کی آوازیں بھی سنی گئیں۔
آتش زدگی اور دھماکوں کے بعد خوف کے شکار علاقہ مکینوں نے گھروں کو خالی کر دیا۔ انڈونیشیائی فائر حکام نے بتایا کہ کم از کم 260 فائر فائٹرز اور 52 فائر انجن آگ پر قابو پانے کے لیے جدوجہد کر رہے ہیں۔
Fire at Indonesian oil depot kills 17; thousands evacuated#Indonesia pic.twitter.com/1HQfcGlgKs
— INDEPENDENT PRESS (@IpIndependent) March 3, 2023
اے پی نیوز کے مطابق ٹیلی ویژن پر نشر ہونے والی آگ کی ویڈیو میں کمیونٹی کے سیکڑوں افراد کو خوف و ہراس میں بھاگتے ہوئے دکھایا گیا، جب کہ سیاہ دھویں اور نارنجی رنگ کے شعلوں نے آسمان کو چھپا دیا تھا، اور فائر فائٹرز آگ پر قابو پانے میں مصروف تھے۔
شمالی جکارتا کے علاقے تانا میرا کے گنجان آباد علاقے میں موجود سرکاری کمپنی سے انڈونیشیا کی ضروریات کا 25 فی صد ایندھن سپلائی کیا جاتا ہے۔ حکام کا کہنا ہے کہ گودام میں آگ لگنے سے ملک میں ایندھن کی سپلائی متاثر نہیں ہوگی۔
