جارج ٹاؤن : جنوبی امریکا کے ملک گیانا میں گرلز ہاسٹل میں آگ لگنے کا خوفناک واقعہ پیش آیا ہے جس میں وہاں موجود 20 طالبات جل کر ہلاک ہوگئیں۔
یہ خوفناک حادثہ مہدیہ سیکنڈری اسکول کے ہاسٹل کی عمارت میں گزشتہ رات پیش آیا، آگ اتنی شدید تھی کہ طالبات کو عمارت سے نکلنے کا موقع ہی نہ مل سکا۔
عالمی خبر رساں ادارے کی رپورٹ کے مطابق لگنے والی آگ نے دیکھتے ہی دیکھتے پوری عمارت کو اپنی لپیٹ میں لے لیا۔ علاقہ مکینوں نے کمروں میں موجود خوف سے چیخ وپکار کرنے والی طالبات کو بچانے کی کوشش کی لیکن کھڑکیوں کی آہنی سلاخوں کے باعث اندر داخل نہ ہوسکے۔
رپورٹ کے مطابق ابھی تک آگ لگنے کی وجوہات کا علم نہیں ہوسکا تاہم عینی شاہدین کا کہنا ہے کہ بارش کے باعث اس وقت بجلی کی آنکھ مچولی جاری تھی، غالب گمان ہے کہ آگ شارٹ سرکٹ کے باعث لگی۔
شدید بارشوں کے باعث ٹرانسپورٹ کی معطلی اور خراب موسم کے باوجود ریسکیو ادارے کے اہلکار امدادی کارروائیاں جاری رکھے ہوئے ہیں۔ امدادی کاموں میں 5 طیارے بھی حصہ لے رہے ہیں شدید زخمی افراد کو اسپتالوں میں منتقل کیا جارہا ہے۔ متعلقہ حکام نے واقعے کی تحقیقات کے لیے انکوائری کمیٹی تشکیل دے دی ہے۔
