قندھار: مسلح دہشت گردوں نے ائیرپورٹ پر فائرنگ کر کے ڈیوٹی پر خواتین کو لانے والی گاڑی کو نشانہ بنایا جس کے نتیجے میں 5 خواتین سیکورٹی اہلکار اور ڈرائیور جاں بحق ہوگیا۔
تفصیلات کے مطابق افغانستان کے شہر قندھارمیں واقع ائیرپورٹ کے قریب ایک موٹرسائیکل پر آئے ہوئے دو مسلح دہشت گردوں نے خواتین کی سیکیورٹی وین پر فائرنگ کی جس کے نتیجے میں 5 خواتین جاں بحق جبکہ گاڑی کا ڈرائیور بھی جاں بحق ہوا۔
گورنر قندھار نے برطانوی خبررساں ادارے سے بات کرتے ہوئے واقعے کی تصدیق کی اور کہا کہ ہفتے کی صبح خواتین اہلکار معمول کے مطابق ڈیوٹی پر آرہی تھیں کہ ائیرپورٹ کے قریب موٹرسائیکل پر سوار 2 مسلح دہشت گردوں نے گاڑی پر فائرنگ کی اور با آسانی فرار ہوگئے۔
پڑھیں: ’’ افغانستان میں بگرام ائیربیس میں دھماکہ،4افراد ہلاک ‘‘
ترجمان افغان حکومت کے مطابق واقعے کی ذمہ داری تاحال کسی نے قبول نہیں کی جبکہ افغان طالبان نے بھی حملے میں ملوث ہونے کی تردید کردی ہے۔ ترجمان نے کہا کہ پولیس نے حملہ آور کی تلاش شروع کردی ہے ۔ حکام کے مطابق واقعے میں جاں بحق ہونے والی خواتین قندھار کے ایئرپورٹ پر سفر کرنے والی خواتین مسافروں کو تلاشی لیتی تھیں۔
واضح رہے افغانستان میں خواتین کے خلاف پرتشدد واقعات میں اضافہ دیکھنے میں آیا ہے، سرکاری اعداد و شمار کے مطابق رواں سال 8 ماہ میں خواتین کے خلاف جرائم سے متعلق 3 ہزار 7 سو سے زائد مقدمات درج ہوئے جب کہ گزشتہ سال یہ تعداد پانچ ہزار تھی۔
