عمان کے دارالحکومت مسقط میں وادی کبیر میں مسجد کے قریب فائرنگ کے نتیجے میں پانچ افراد جاں بحق ہوگئے جن میں دو پاکستانی بھی شامل ہیں۔
عرب میڈیا کے مطابق مطابق یہ واقعہ گزشتہ روز امام علی مسجد میں رونما ہوا۔ فائرنگ کے نتیجے میں پانچ افراد جاں بحق جب کہ کئی کے زخمی ہونے کے اطلاعات ہیں۔
رپورٹ کے مطابق فائرنگ کے وقت مسجد میں مجلس عزا جاری تھی اور 700 سے زائد افراد موجود تھے جن میں زیادہ تعداد پاکستانیوں کی تھی۔
پولیس کا کہنا ہے کہ صورتحال سے نمٹنے کیلیے تمام ضروری حفاظتی اقدامات اور طریقہ کار اختیار کیے گئے ہیں۔ تحقیقات جاری ہیں اور واقعے کی وجوہات پتہ لگانے کیلیے شواہد جمع کر رہے ہیں۔
دوسری جانب عمان امام بارگاہ پر دہشتگردی کے واقعے میں دو پاکستانی شہریوں کے جاں بحق ہونے کی تصدیق ہوگئی ہے۔
عمان میں پاکستانی سفیر علی عمران چوہدری نے اے آر وائی نیوز سے گفتگو کرتے ہوئے کہا عمان کی حکومت نے اس واقعے میں 4 افراد کے جاں بحق ہونے کی تصدیق کی ہے جن میں دو پاکستانی شامل ہیں۔
پاکستانی سفیر نے کہا کہ سفارتی عملہ گزشتہ رات اسپتال میں موجود تھا جب کہ وہ خود عمانی حکام سے رابطے میں ہیں۔ حکومت امام بارگاہ پر حملے کی تحقیقات کر رہی ہے۔
