ریاض: سعودی عرب، خلیجی ریاستوں سمیت ترکی، آسٹریلیا، یورپ اور امریکا میں آج پہلا روزہ رکھا جائے گا۔
تفصیلات کے مطابق بابرکت مہینے کے آغاز کے لیے دنیا بھر میں تیاریاں جاری ہیں، خلیجی ریاستوں سمیت آج یورپ اور امریکا میں پہلا روزہ رکھا اور افطار کا اہتمام کیا جائے گا۔
دنیا بھر میں استقبال رمضان کی تیاریاں عروج پر پہنچ گئیں، سعودی عرب، متحدہ عرب امارت اور خلیجی ریاستوں میں پیر کو پہلا روزہ ہوگا، مسجد الحرام میں مسلمانوں کی بڑی تعداد آج پہلی تراویح ادا کی۔
مسجد نبوی میں بھی پہلی تراویح پڑھی گئی، متحدہ عرب امارات توپ کے گولے داغ کر افطار کے وقت کا اعلان کرنے کی روایت برقرار رکھتے ہوئے دبئی، شارجہ سمیت مختلف شہروں میں توپیں نصب کردی گئیں۔
ترکی، آسٹریلیا، یورپ، برطانیہ اور امریکا کے مختلف شہروں میں بھی پیر سے ماہ رمضان کا آغاز ہوگا۔
ترکی میں رمضان بازار سج گئے ہیں، ماہ صیام کے اہتمام کیلئے لوگ خریداری میں مصروف ہیں، نیوزی لینڈ میں ماہ رمضان کے آغاز پر سیکیورٹی کے سخت انتظامات کئے گئے ہیں۔
دوسری جانب پاکستان میں آج ماہ صیام کا چاند نظر نہیں آیا، مرکزی رویت ہلال کمیٹی نے باقاعدہ پریس کانفرنس کرتے ہوئے چاند نہ نظر آنے کی تصدیق کی۔
قبل ازیں وفاقی وزیر برائے سائنس اینڈ ٹیکنالوجی فواد چوہدری نے اعلان کیا تھا کہ رویت ہلال کمیٹی کے لیے 5 رکنی کمیٹی قائم کردی گئی جو آئندہ 10 قمری سالوں کا کلینڈر جاری کرے گی۔
پاکستان بھر میں رمضان المبارک کا چاند نظر نہیں آیا، پہلا روزہ 7 مئی کو ہوگا
سماجی رابطے کی ویب سائٹ ٹویٹر پر فواد چوہدری کا کہنا تھا کہ رویت ہلال کے لیے 5 رکنی کمیٹی قائم کردی گئی، جس میں اسپارکو، محکمہ موسمیات اور ٹیکنالوجی ماہرین شامل ہیں۔
