کراچی : ہمارے معاشرے میں اکثر شادی کے بعد سسرال والوں کی خصوصی دعوت کا اہتمام بطور رسم کیا جاتا ہے جسے عام طور پر ’چوتھی کی دعوت‘ کہتے ہیں۔
ویسے تو ہر دعوت میں میزبان کی کوشش ہوتی ہے کہ مہمانوں کے سامنے لذیذ اور منفرد ذائقے دار کھانے پیش کیے جائیں اور یہ مسئلہ بہت سوچ بچار کے بعد حل کیا جاتا ہے۔
اے آر وائی ڈیجیٹل کے پروگرام گڈ مارننگ پاکستان میں شیف سونیا نے اس مخصوص دعوت میں پکانے والے کھانوں سے متعلق اہم معلومات فراہم کیں جو خواتین کی بہت سی مشکلات کو آسان بنا سکتی ہیں۔
انہوں نے بتایا کہ چوتھی کی دعوت میں شادی ولیمے سے ہٹ کر پکوان بنانے چاہئیں، بریانی قورمہ وغیرہ تو عام سی بات ہے لیکن اس دعوت میں ذرا مختلف ہونا چاہیے۔
شیف سونیا کا کہنا تھا کہ اس موقع پر مہمانوں کے سامنے چرغہ بنا کر پیش کرسکتے ہیں اور اگر میں چاول بھر دیے جائیں تو مزہ دوبالا ہوجاتا ہے۔
اس کے علاوہ حلیم بنوالیں اور کوئی چائنیز ڈش بنانا چاہیں تو وہ بھی ایک اچھا آئیڈیا ہے، یا پھر مچھلی فرائی ، کنّہ پایا بھی کرسکتے ہیں اور چوتھی کی دعوت میں سبزی بھی لازمی بنائی جاتی ہے۔