کراچی: ایم کیو ایم اور پی ایس پی کے درمیان پہلا باضابطہ رابطہ آج متوقع ہے۔
ذرائع کے مطابق کنونئیر ایم کیو ایم ڈاکٹر خالد مقبول صدیقی آج ممکنہ طور پر پاکستان ہاؤس جائیں گے، خالد مقبول کے ہمراہ خواجہ اظہارالحسن بھی ہوں گے۔
ذرائع کا کہنا ہے کہ کنونئیر ایم کیو ایم پاک سرزمین پارٹی کی قیادت سے مل کر انھیں حلقہ بندیوں کی درستگی کے لیے مل کر آواز اٹھانے کی دعوت دیں گے۔
ممکنہ طور پر پاکستان پیپلز پارٹی کی جعلی حلقہ بندیوں کے خلاف بلائی جانے والی اے پی سی میں شرکت کی دعوت بھی دی جائے گی۔
الیکشن کمیشن کے حکم پر سندھ حکومت نے ایم کیو ایم کی فرمائش پر لگائے گئے ایڈمنسٹریٹرز کو ہٹا دیا
ملاقات میں سیاسی صورت حال، گورنر سندھ سے پی ایس پی قیادت کی ہونے والی ملاقات سمیت شہر کراچی کی ترقی، استحکام اور مسائل کے حل کے لیے ساتھ چلنے سمیت دیگر امور بھی زیر غور آئیں گے۔
ذرائع کے مطابق ایم کیو ایم کا وفد جنرل ورکرز اجلاس کے بعد پاکستان ہاؤس جائے گا۔
