لاہور : ملک بھر میں آٹے کی قیمتیں تاریخ کی بلند ترین سطح پر پہنچ گئیں ، لاہور سکھر اور پشاور میں آٹا 150 فی کلو ہوگیا، جس پر شہری بلبلا اُٹھے۔
تفصیلات کے مطابق ملک بھر میں آٹے کے بحران کے باعث قیمتیں آسمان چھونے لگیں، مختلف شہروں میں آٹا 150 روپے میں فروخت ہونے لگا۔
چوبیس گھنٹے میں فی کلو آٹا بیس روپے مہنگا ہوا ، یوٹیلیٹی اسٹورز پر سستا آٹا کے انتظارمیں شہری خوار ہوگئے۔
فیصل آباد میں آٹا 145روپے کلو،لاہورمیں150 روپے ہوگیا ، اسی طرح کراچی سمیت سندھ میں حالات بڑے خراب ہیں، سکھر میں آٹاایک دن میں بیس روپے اضافہ کے ساتھ ایک سوپچاس روپے اور کراچی میں150 سے 160 روپے فی کلو ہوگیا۔
پنجاب سے گندم سپلائی کی بندش کے باعث پشاور میں بیس کلو آٹے کے تھیلے کی قیمت تین ہزار روپے ہوگئی ہے۔
لاہور میں گندم کی فی من قیمت4ہزار800 روپے تک پہنچ گئی ، پنجاب حکومت فلور ملز کو گندم 2 ہزار200 روپے فی من فراہم کررہی ہے اور گندم کی قیمت 3 ہزار روپے فی من مقرر کی گئی ہے۔
ملتان میں 10 کلو آٹے کا سرکاری تھیلا 648 روپے اور 20 کلو آٹے کا سرکاری تھیلا 1295 روپے میں فروخت ہورہا ہے جبکہ فائن آٹےکے 15 کلو تھیلے کی قیمت 1800 سے 2000 روپے ہوگیا ہے۔
سکھر میں بھی ہول سیل مارکیٹ میں آٹا 135روپے کلو ہوگیا جبکہ عام مارکیٹ میں آٹا 150 کلو ، چکی کا آٹا 155 روپے فی کلو مل رہا ہے جبکہ 2 روز قبل دس کلو آٹے کا تھیلا1250روپے کا تھا اور آج اوپن مارکیٹ میں آٹےکے10کلو تھیلے کی قیمت 1350روپے ہوگئی۔
کوئٹہ سمیت بلوچستان کے دیگر شہروں میں آٹے کی قلت اورقیمت میں اضافہ برقرار ہے ، ایک ہفتہ قبل 2300 میں فروخت ہونیوالا 20 کلو آٹے کا تھیلہ 2800 روپے پرجا پہنچا۔
